Baroyê Colemêrgî derheqê destbendkerdişanê Geverî de eşkerayî daye û baroyî da zanayene ke destbendkerdişî ne goreyê prensîbanê huqûqî yê û ne zî qanûnî yê û waşt herkes bilez bêro veradayene.
Baroyê Colemêrgî derheqê destbendkerdişanê rojanê peyênan de ke qezaya Gever ya Colemêrg de yenê kerdene, eşkerayîyêka nuştekî daye. Eşkerayî de ame dîyarkerdene ke rojanê peyênan de Colemêrg de dimayê rayîrşîyayîş û çalakîyanê aştîyane sereştişê keyeyan de welatijî yenê destbendkerdene. Baroyî da zanayene ke mîyanê destbendkerdeyan de gedeyî zî est ê û xeylê kesî bi îdiaya “propagandaya rêxistine” ameyê destbendkerdene.
Eşkerayî de ame dîyarkerdene ke goreyê Mehkemaya Qanûnê Bingeyîn û Mehkemaya Heqanê Merdiman a Ewropa çalakîyî ke şîdet, tehdît û zordestî tede çin ê, nêeşkenê bibê babeta cipersayîşî û cezakerdişî. Baroyî eşkerayî de bale ant girewtişê gedeyan ser o û vat ke no ganî hetê sîstemê edaletî gedeyan ra, Qanûnê Pawitişê Gedeyan û peymanê mîyanneteweyî bi şert û hesasîyet bêro erjnayene.
Sewbîna eşkerayî de ame vatene ke bi şîrove û vatişê sûrkerdişî yê vera çalakîyanî ke çarçewaya azadîya îfade û kombîyayîşan de yenê kerdene û bi sucê “propagandaya rêxistine” destbenkerdeşî ke yenê kerdene, bi eşkerayî vera prensîbanê qanûnanê dewlete yê.
Baroyê Colemêrgî eşkerayî de vengda îqtîdarî ke girewtişanê neqanûnî bida vindarnayene û welatijê ke ameyê destbendkerdene, bilez bêrê veradayene û proses çarçewaya qanûnî de bêro rayraberdene. Baroyî dîyar ked ke do nê prosesî bi hewayêko qanûnî taqîb bikero.
