Dayîkanê Aştî yê Stenbolî seba şermezarkerdişê hêrişanê vera Rojava, vernîya Sersefîrîya Îngîlîstanî û eşkerayî dayî. Dayîka Aştî Sabîha Bozan dîyar kerd ke dayîkî şer nêwazenê.
Çekdarê hukmatê demkî yê Şamî bi piştgirîya Tirkîya rixmê qerarê adirbestî zî hêrişê Rojava kenê. Dayîkanê Aştî yê Stenbolî zî seba piştîdayîşê Rojava taxa Beyogluyî de vernîya Sersefîrîya Îngîlîstanî de eşkerayî daye.
Dayîkanê Aştî, aktîvîstê TJA’yî, temsîlkarê partîyanê sîyasî û sazgehanê komelkî û zaf kesî beşdarê eşkerayî bîyê. Dayîkanê Aştî sloganê “Bijî Berxwedana Rojava” û “Jin Jiyan Azadî” vatî.
Dayîkanê Aştî waşt çelengî ronê vernîya berê sersefîrîya la polîsan hêrişê dayîkan kerd. La rixmê hêrişanê polîsan zî dayîkan çelengî ronayî û eşkerayî daye.
‘Dayîkî şer nêwazenê’
Dayîka Aştî Sabîha Bozan qisey kerd û dîyar kerd ke ê seba waştişê aştî tîya de yê û vat: “Dayîkî şer nêwazenê. Ê ameyî vernîya Sersefîrîya Îngîlîstanî la hêrişê ma kerd. Ma waşt mesajê aştî bidê la destur nêda. La Dayîkê Aştî do şêrê her ca.”
‘Wa destanê xo kurdan ser ra biancê’
Dima Dayîka Aştî Sultan Bozkurt qisey kerd. Sultan Bozkurt îfade kerd ke ê tîya de DAÎŞ’î şermezar kenê la hêriş yeno kerdene înan ser o û vat: “Trump bazirganê gonî yo. Îngîlîstan zî wina yo. Wa destanê xo şarê kurdî ser o ra biancê.”
Badê eşkerayî çalakî qedîyaye.
