Hêrişanê koalîsyonê dewleta tirke û DAÎŞ-El Qaîdeyî yê vera kurdan ra dim veradayîşê mehkuman DAÎŞijan çapemenîya dinya de ca girewt. Rojnameyê Belçîka La Libreyî nuşt: “Kurdan rê xayînîye hewn ra wirznayîşê DAÎŞ’î yo.”
Reutersî bale ante ke hêrişê HTŞ’yî eşkenê têkilîyanê Sûrîye yê Amerîka û Tirkîya ser o tesîr bikerê û îşaret kerd ke qederê bi hezaran DAÎŞijan zelal nîyo. Xebere de zordayîşê Tirkîya yê “bêçekkerdişê” QSD’yî zî ca girewt..
The Guardianî nuşt ke rewşa emnîyetê Rojawanê Kurdîstanî roje bi roje xerabêr bena û endîşeyê reyna vejîyayîşê DAÎŞ’î zêde benê. The New York Timesî dîyar kerd ke artêşa Amerîka heta nika 150 DAÎŞijî berdî Iraq û na hûmare eşkena biresa heta 7 hezarî zî. BBC’yî zî îfade kerd ke operasyonanê neqlî badê kampan ra xotepîya antişê QSD’yî dest pêkerd.
Long War Journalî dîyar kerd ke îdareyê Iraqî endîşeyê pêkewtişan kena, Deutsche Welleyî zî bale ante protestoyanê girseyan ke Almanya de vera hêrişanê Rojawanî ameyî viraştene. Ame dîyarkerdiş ke sere de Dortmund, Frankfurt û Bremen xeylê bajaran de bi hezaran kesî beşdarê çalakîyan bîyî û tayê bajaran de mudaxeleyê polîsan bîyî.
Rojnameyê Belçîka La Libre de sernuşteyê “‘Kurdan rê xayînîye hewn ra wirznayîşê DAÎŞî yo'” ame xebitnayene. Nuşteyî de nê vatişan ca girewt: “Dîmenê ke Sûrîye ra yenê ma qebul nêkenê. Nê dîmenî şîdetê giranî yê hêzanê rejîmê Sûrîye û mîlîsîyan ke vera şarê kurdî yenê kerdene, nîşan danê. Îşkence, îdamê bêhuqûqî û şîdetê bêsînorî ke vera sîvîl û domanan yenê kerdene. Barbarîye karî ser o ya.”
Radyoya Fransa Franceinfo bale ante ke bi hezaran DAÎŞij û endamê keyeyan eşkenê remîyabê: “Sûrîye de endîşeyê verdayîşê terоrîstanê DAÎŞ’î zêde benê. Çend rojan ra nat kurdî hetê artêşa Sûrîye ra yenê hêrişkerdene. Merkezê pêkewtişî de zindanî est ê ke bi hezaran cîhadîstî tede yê û heta nika hetê kurdan ra ameyêne tepîştene. Şervanê Dewleta Îslamî yê verênî û bi des hezaran cinî û domanî eşkenê biremê.”
