Parlamenterê DEM Partî yê Riha Ferîd Şenyaşarî hêrişê vera Rojawanî şermezar kerd û vat: “Zerrîya şarê kurdî Rojawan de ya. Ma bi ruhê xoverdayîşê Kobanê şinê sînorê Rojawan.”
Şenyaşarî dîyar kerd ke ê sînorê Kobanê-Pirûsî de yê û vat: “Reyna şarê kurdî yê Rojawanî ser şerêko pîs yeno ramitene. 2014î de zî DAÎŞ’î bajaranê Rojawanî ser o hêriş kerdbî. Şarê kurdî çar parçeyanê Kurdîstanî ra sînorê Pirsûs-Kobanê de kom bîbî. Şarî wayîrê Kobanê vejîyabî û şer ser kewt. Nika reyna şerêko çekdarî hem zî şerêko taybetî yeno ramitene. DAÎŞ şerê çekdarî rameno, dewleta tirke zî şerê taybetî ramena.”
Şenyaşarî vat: “Zerrîya şarê kurdî Rojawan de ya. Tirkîya bi teyareyanê bêpîlotan û endamanê SMO’yî şarê kurdî ser o hêriş kena. Ma dewleta tirke ra vanê prosesê haştîye Tirkîya de yeno ramitene labelê Rojawan de qirkerdişan kenê. Eke haştîye wazenê ganî verê estbîyayîş û statuyê şarê kurdî qebul bikerê.”
Şenyaşarî tewr peynî de vat: “Ganî her kes beşdarê nê şîyayîşî bibo. 22yê aşme de ma şinê sînorê Pirsûs-Kobanê. Ma venga şarê kurdî danê. Ma hêrişan qebul nêkenê û şermezar kenê.”
