Îlham Ehmed dîyar kerd ke ê cehd kenê ke vernîyan şeranê neweyan bigîrê la riyê nêzdîbîyayîşê Şamî ra ewro ma resayê na nuqta. Îlham Ehmed vat ke ganî şarê kurdî helwêstê xo yê neteweyî bimojno.
Hemsereka Dayîreyê Têkilîyanê Teberî yê Rayberîya Xosere ya Vakur û Rojhelatê Sûrîye Îlham Ehmed seba hêrişanê çeteyanê HTŞ û SMO’yî eşkerayîyêka nuştekî daye.
Eşkerayîya Îlham Ehmed wina ya:
“6ê çeleyî ra nat grûbê girêdayeyê artêşê Sûrîye vera şarê ma hêrişanê bişîdet keno. Amancê hêrişan qirkerdişê kurdan o. Bi qirkerdişê kurdan amanc kenê ke cuya hempare ke paştîya xo dana waûbirayîya şaran, orte ra wedarnê. Destêpêkî hêrişan ra ma cehd kerd ke vernîya şeranê neweyan bi rayîrê dîyalogî bigrê û çareser bikerê. Bi nê amancê ma peymane îmza kerd. Madeyo yewin ê peymane de adirbest est bi. Seba ney ma biney wext waşt la hukmat girêdayeyê peymane nêmend. Nê semedî ra vengdayîşê ma şarê ma rê o yo ke wa xo ra bawer bibê, vindertişê xo yo biîrade û helwêstê xo yê neteweyî bimojno.
Bi taybetî şarê ma yê Kobanê, 2014î de hemverê hêzo tewr bi tehluke ê dinya de têkoşînêk mojna. Ma bawer kenê ke do eyn têkoşînî reyna bimojnê.
Qadanê mîyanneteweyî de, babetanê dîplomasî, xopawitiş û xoverdayîşî de ganî şarê ma her ca de helwêstê xo bimojno.
Ma vengdanê hêzanê mîyanneteweyî û raya pêroyî ke hemverê no şer o ke şarê ma rî bi rî yo, helwêstê xo yê hemverê hêrişanê qirkerdişî bi hewayêko zelal dîyar bikerê.
No şar seba ke dinya bipawo, gedeyê xo kerdê feda. Nê semedî ra berpirsîyarîya xo ya exlaqî bi ca bîyarê û helwêstê xo bimojnê.
Ganî vernîya nê herişan bêra girewtene ke vera şarê ma yeno kerdene.”
