Muxabîrê ajansê ma Nedîm Oruç o ke bi derbeyan û pirodayîşan amebî destbendkerde di rojîyo emnîyetê Şirnexî de yo.
Muxabîrê Ajansê Welatî Nedîm Orûç 14ê çeleye de taxa Nûre yê Cizîre de wexto ke çalakîkeran verva hêrişanê Rojava ser şopnaynê, hetê polîsan ra bi pirodayîş ame destbendkerdene. Muxabîrê ma Nedîm Oruç di rojî yo Mudirîyetê Polîsan ê Şirnexî de destbendkerde yeno girewtene. Vizêrî qerarê dergkerdişî amebî dayene.
Avûkatan Nedîm Oruçî reyde pêvînayîş viraşt û dîyar kerd ke rewşa ey baş o û ê paweyê ke îfadeyê ey Mudirîyetê Polîsan de bêrê girewtene.
Komela Rojnamegeran ê Dîcle Firatî (DFG) zî serê hesabê xo yê Xî û Instagramî de derheqê destbendkerdena Nedîm Oruçî malûmat pare kerd û dîyar kerd ke hemmeslekê înan Nedîm Oruç bi pirodayîş amebi destbendkerdene û di rojî yo Mudirîyetê polîsan de yeno girewtene. DFG’yî waşt Nedîm oruç bilez bêro veradayîş û dîyar kerd ke rojnamegerî sûc nîyo.
