Meclîsê Şar ê Şêxmeqsûd û Eşrefîye derheqê hêrişanê taxanê înan ser o eşkerayî daye û vat: “Ma qerar da ke ma taxanê xo de bimanê û pawitişê taxanê xo bikerê.”
Meclîsê Şar ê Taxanê Şêxmeqsûd û Eşrefîye derheqê hêrişanê grûbanê çete yê girêdayeyê HTŞ û Tirkîya eşkerayîyêka nuştekî vila kerde.
Eşkerayîya Meclîsê Şarî wina ya:
“Roja 6ê çeleyî ra taxanê ma ser p hêrişêko bi çekanê giran û bombaranêo zehmet yeno kerdene. Nê hêrişan de camî, dibistan, nêweşxane, malê sîvîl û sazgehanê xizmetî bi temamî ameyê hedefgirewtene.
Şarê ma û hêzê ma yê asayîşî vera nê hêrişan xoverdayîşêko gird mojna.
Bi nê hêrişan yeno amanckerdene ke vera şarê ma yê nê taxan ke bi seyan serrî yo n^etaxan de vera welatijanê nê taxan, qetlîam û pêlêko newe yê koçberîye bidê destpêkerdene. Yanî yeno waştene ke demografîya şaristan û taxanê ma bêro bedilnayene. Eynê wextî de nê hêrişî bi her hewayî yenê manayê binvistişê peymana 1ê nîsane û îhlalkerdişê aye.
Hukmatê demkî yê Şamî nê hêrişan binê nameyê Artêşê Sûrîye yo newe de û bi paştîya dewleta tirkan û çeteyanê girêdayeyê înan keno û ney ra cesaret gêno. Eynê wextî de ma bêvengîya hêzanê mîyanneteweyî yê ke seba peymana 10ê adare û 1ê nîsane sey garantor û çimdar amade bîyê zî bi hişk şermezar kenê.
Tehlukeya qirkerdişî dewam kena
Hêriş û tehlukeyê qirkerdişî yê vera şarê ma yê Şêxmeqsûd û Eşrefîye heta nika zî dewam kenê.
Vengdayîşo ke hêzanê hukmatê demkî yê Şamî seba şar û hêzanê ma yê asayîşî kenê, ferzkerdişê teslîmbîyayîşî yo la larê ma yê nê taxan seba ke taxanê xo de bimanê û pawitişê taxanê xo bikerê, qerardar ê.
Rewşa nikayîne de cayê ke çeteyî aver şîyê vera sîvîlan qetlîam yenoı kerdene. Yanî eyn kerdiş û qetlîamo ke vera elewî û durzîyan ameyo kerdene, taxanê ma de zî yeno kerdene.
Wazenê şar taxan ra vejîyo
Her kes zano ke nê taxan de bi se hezar sîvîlî est ê û encamê bombaranê giran ê vera sîvîlan de bi desan birîndarê ma bîyê. Nê birîndaran ra xeylê kesî cinî û gede yê. Nêweşxaneyê ma yê taxe yê bi nameyê Xalid Fecir ke xora îmkanê xo zaf kêm bîyê zî, rastê hêriş û bombaranêko giran ame. No sucê şerî îfade keno. Rewşa nikayîne de nêweşxane bi temamî xizmet ra vejîyayo. Bi tu hewayî îmkanê ke birîndarî bêrê dermankerdene, taxanê ma de nêmendo. Warê merdimî de krîzêko cidî est o. Seke raya pêroyî zî zana, no demêko derg bi ke taxê ma dorpêçî de bîyê û kewtişê tazxe yê lazimtîyanê merdimî ameyêne astengkerdene. Sewbîna zimistan rewşa nikayîne hîna giran keno.
Encamî de hêzê hukmatê demkî tewrê çeteyanê xo vengdayîşê teslîmbîyayîşî taxanê ma rê keno û wazenê şar taxan ra vejîyo. Eynê wextî de teslîmbîyayîşê hêzanê ma yê asayîşî yeno waştene.
Ma do taxanê xo bipawê
Ma sey rayberîya Meclîsê Şêxmeqsûd û Eşrefîye zilmê şar û taxanê xo ser o qebul nêkenê. Riyê kerdişanê hukmatê Şamî ke ameyîşê îqtîdarî ra hetanika ke vera beşanê cîya û zafrengîyanê cîya yê Sûrîye kerdê û bi taybetî zî bombaran û qetlîamê ke nê rojanê peyênan de vera şarê ma kerdê, bawerîya ma çin a ke ma ewlekarî û taxanê xo teslîmê înan bikerê. Seba ney zî mumkin nîyo ke ma hetê girewtişê ewlekarîya taxanê xo de apey game bierzê. Ma qerar dayo ke ma taxanê xo de bimanê û pawitişê taxanê xo bikerê.
Vengdayîşê seferberîye
Tewr peyên ma vengd danê şarê xo yê Şêxmeqsûs û Eşrefîye ke verê xo bidê Nêweşxaneyê Xalid Fecir ke birîndaranê xo rê wayîr vejîyê û seba pawitişê taxanê xo seferber bibê.”
