Hêzê Ewlekarîya Zereyî yê Helebî eşkera kerd ke encamê hêrişanê hukmatê demkî yê taxanê Şêxmeqsûd û Eşrefîye de 8 sivîlî ameyê qetilkerdene û 57 kesî zî birîndar bîyê.
Hêzê Ewlekarîya Zereyî yê Helebî derheqê rewşa peyêne ya taxanê Şêxmeqsûd, Eşrefîye û Benî Zêdî de eşkerayîyêk pare kerde
Eşkerayî wina ya:
“Encamê hêriş û topbaran û dronan de ke hetê grûbanê girêdayeyê hukmatê Şamî yê vera taxanê Şêxmeqsûd û Eşrefîye yê Helebî ameyê kerdene, 8 sîvîlî ameyê qetilkerdene û 57 kesî zî birîndar bîyê. Hêrişê nê grûban 3 rojî yo pêser vera cayanê sîvîlan dewam kenê.
Vizêr şandî nê grûban bi zanayîş seba ke hûmara qurbanîyan vêşî bikerê, topbaranê xo yê taxanê sîvîl ser o vêşî kerdê. Eynê wextî de dronî zî her di taxan ser o firenê. Sewbîna nê grûban erebeyê zirxî ardê herême û bi hezaran çekdarî seferber kerdê, mîyanê nînan de çekdarê xerîbî zî est ê.
Bejayî de nê grûban saya xoverdayîşo qehremanî yê Hêzanê Ewlekarîya Zereyî nêeşkayî Kastelo de aver şêrê. Dima ke binkewtê dest bi cezakerdişanê grûbî kerd, elektrîkî birna û kewtişê werd û hacetanê doktoran her di taxan de asteng kerd. No bi eşkerayî binpaykerdişê qanûnanê merdimîye yê mîyanneteweyî yo.
Çîyê ke taxanê Şêxmeqsûd û Eşrefîye de qewimîyenê, hêrişêko sîstematîk û gonî yo ke binê sîya rayberîya fermî de yenê kerdene. No rasterast sîvîlan hedef gêno. Dorpêçkerdiş, topbarano bêserûber û vêşanîye sey amûr şuxulnenê ke welatijan eciz bikerê û rewşêka newa înan ser o ferz bikerê.
Ma hetanê hêrişkar û yê ke paştî danê înan, bi pêroyê berpirsîyarîya nê sucan û encamê înan vînenê. Ma dîyar kenê ke dewamê nê nêzdîbîyayîşê hêrişkar do bibo sebebê encamanê xirab.”
