Partîya Herêman a Demokratîke hêrişanê ke vizêrî ra taxanê Şêxmeqsûd û Eşrefîye de yenê kerdene, eşkerayîyêk vila kerd. Eşkerayî de ame dîyarkerdene ke nê hêrişî ke yenê kerdene, dekûdolabê kesanê ke vera çareserî yê, ganî merdim nînan baş bivîno.”
Eşkerayîya Partîya Herêman a Demokratîke (DBP) wina ya:
“Hêrişî ke vizêrî ra taxanê Şêxmeqsûd û Eşrefîye yê Helebî ser o dewam kenê, seba ke rasterast sîvîlan kenê hedef, sucê vera merdimîye yê. Nê hêrişî ke hetê grûbanê çekdar ê girêdayeyê hukmatê demkî ê Sûrîye yê bi tank û bombabaranêko giran yenê rayraberdene, bîyê sebebê vîndîbîyayîşanê sîvîl ke mîyanê înan de gedeyî zî est ê.
‘Taxanê kurdan bi zanayîş kenê warê şer û pêkewtişan’
Bi hewayêko sîstematîk hedefgirewtişê qadanê welatijan mojneno ke heqê cuye yê sîvîlan bi zanayîş yenê binpaykerdene û taxê kurdan bi zanayîş kenê warê şer û pêkewtişan.
‘Çîyê ke qewimîyenê tesaduf nîyê’
Çîyê ke qewimîyenê binpaykerdişê huqûqê mîyanneteweyî yê merdimîye yo. Bi hêrişanê ke saetanê şewe de zî dewam kerdê, Şêxmeqsûd û Eşrefîye bi hewayêko fîîlî ameyê dorpêçkerdene û zemînê operasyonêko hîra û wêranêr yeno amadekerdene. No tesaduf nîyo; tercîhêko bi zanayîş, palankerde û sîyasî yo.
‘Îhtîmalê çareserî yeno sabotekerdene’
Heto bînî ra prosesêko ke entegrasyonê Hêzanê Sûrîya Demokratîke (HSD) seba artêşê Sûrîye yeno munaqeşakerdene û têkilî û cigêrayîşê çareserî mabênê hetan de rojeve de yo, caardişê nê hêrişan çîyêko rêze ra nîyo. Na rewşe nîşaneyê xurt xo de hewînena ke çîyê ke qewimîyenê hetê kesanê vera çareserî yê bi amancê sabotekerdişê îhtîmalanê çareserî ameyo plankerdene.
Nê hêrişî ke kurdan kenê hedef, tena ewro nê, ameyoxî de zî Sûrîye de îhtîmalê pêameyîşêko sîyasî kişenê. Nê hêrişî ke kurdan kenê hedef, tena binê zemînê ewro yê pêameyîşî nê eynê wextî de binê zemînanê pêameyîşanê ameyoxî zî kişenê.
‘Hêzê hêrişkarî ganî bêrê vindarnayene û teşhîrkerdene’
Hêzê mîyanneteweyî û heme aktorê wezîfedarî êdî ganî pozîsyonê temaşekerdoxî ra vejîyê. Ganî seba pawitişê sîvîlan bilez berpirsîyarî bêra girewtene, hêrişî bilez bêrê vindertene û hêzê hêrişkarî bi eşkerayî bêrê teşhîrkerdene. Nê ke çîyê ke Heleb de qewimîyenê do pêroyê Sûrîye de bibê sebebê rijîyayîşanê gird û şikîyayîşan kê apey nêagêrenê.”
