Rojnameger Huseyîn Aykol ke vizêr şand nêweşxaneyo ke tede ameyêne dermankerdene, cuya xo vîndî kerd. Zîyaretê tezîyeyî buroyê Ajansê Mezopotamyayî û Yenî Yaşamî de yenê qebulkerdene. Hemserekê Pêroyî yê DEM Partî keye û embazê Huseyîn Aykolî zîyaret kerd.
Mamosteyê Çapemenîya Azade rojnameger û nuştox Huseyîn Aykol 14ê teşrîna verêne ra Nêweşxaneyê Perwerde û Cigêrayîşî yê Sîncanî de beşê awarte de ameyêne demankerdene, cuya xo vîndî kerd. Seba Huseyîn Aykolî siba saete 10:30î ra heta 12:30 Sehneyê Yilmaz Guney ê Qezaya Çankaya ya Anqara de merasîmêk bêro kerdene. Merasîmî ra pey Huseyîn Aykol do sete 14:00î de Goristanê Karşiyaka yê Qezaya Yenîmahalle ya Anqara de bêro oxirkerdene. Dimayê karûbaranê derfinkerdişî Şubeyê Komela Heqanê Merdiman (ÎHD) ê Anqara de tezîye bêra ronayene.
Dima ke rojnameger û nuştox Huseyîn Aykolî cuya xo vîndî kerd, keyeyê Aykol û embazê ey buroyê Ajansê Mezopotamya (MA) û Yenî Yaşamî de zîyaretan qebul kenê. Saetanê serê sibayî ra xeylê rojnameger, merdim û heskerdoxê Huseyîn Aykolî tezîye zîyaret kenê û serweşîye wazenê. Hemserekê Pêroyî yê DEM Partî û parlamenterê DEM Partî zî tezîye zîyaret kernê û embaz û keyeyî rê serweşîye wazenê.
