Şubeyê EGÎTÎM SEN’î yê Wanî Musabeqeya Hîkayeyanê Cinîyan a Rojîn Kabaîş daye destpêkerdene. Endama EGÎTÎM SEN’î Olcay Çomleklî Yurdakul dîyar kerd ke amancê înan o yo ke bale biancê kiştişê cinîyan ser o û vat: “Hêvî û înadê ma o yo ke ma dinya û welatêk awan bikerê ke êdî tede cinî nêyenê qetilkerdene.”
Wendekara Unîversîteya Yuzuncu Yilî ya Wanî Rojîn Kabaîş 27ê êlule 2024î de vîndî bîye. 18 rojan ra pey cenazeyê Rojîn Kabaîş qeraxê Deryaya Wanî de ame vînayene. Seba Rojîn Kabaîş Kurdîstan û xeylê şaristananê Tirkîya de sazgeh û welatijan çalakî organîze kerdê û vera roşnînêkerdişê hedîseyî reaksîyon mojna. Şubeyê Sendîkaya EGÎTÎM SEN’î ya Wanî seba ke bale bianca kiştişê Rojîn Kabaîş û heme cinîyan ser o, do Wan de mabênê tarîxanê 31ê çele û 14ê adara 2026î de “Musabeqeya Hîkayeyanê Cinîyan a Rojîn Kabaîş” organîze bikera. Muracatan dest pêkerdo. Do muracatî 31ê çeleyî de biqedîyê. 31ê çileyî ra pey hîkayeyî ke do şêrê destê jurîyî, ê bêrê erjnayene û 14ê adare de encam bêro eşkerakerdene.
‘Ma wazenê bi rayîrê edebîyatî hedîse rojeve de verdê’
Endama Şubeyê EGÎTÎM SEN’î ya Wanî Olcay Çomleklî Yurdakul derheqê “Musabeqeya Hîkayeyanê Cinîyan a Rojîn Kabaîş” de ard vîrî ke Rojîn Kabaîş 27ê êlula 2024î de Unîversîteya Wanî de vîndî bîya û 15ê teşrîna verêne de zî cayo ke vîndî bîbî, uca ra gelekî dûrî ameye vînayene. Olcay Çomleklî Yurdakul bale ant mergo biguman ê Rojîn û vat: “Destpêkê vat aye xo kişto. La keyeyê aye ney qebul nêkerd û têkoşînê edaletî da. Ma zî wazenê paştî bidê têkoşînê keyeyê Rojîn Kabaîşî. Ma wazenê bi rayîrê edebîyatî Rojîn Kabaîş û heme cinîyanê ke ameyê qetilkerdene, rojev de bitepşê.”
‘Amancê ma o yo ke her serre bêro kerdene’
Olcay Çomleklî Yurdakul diyar kerd ke şubeyê Egîtîm Senî yê Wanî heta nika nameyê cinîyan ser o çîyêko winasîn nêkerdo û vat: “Nameyê Musa Anterî ke têkoşînê aştî e xeylê muhîm o, ma musabeqaya futbol û voleybolî kerda. Na musabeqaya yewin a ke nameyê cinîyan ser o yena kerdene. Waştişê ma o yo ke na Musabeqaya Hîkayeyanê Cinîyan a Rojîn Kabaîş her serre bêra kerdene.”
‘Mergêko biguman o’
Olcay Çomleklî Yurdakul dîyar kerd ke keyeyê Rojîn Kabaîş reyde kewtê mîyanê dayîşûgirewtişî û înan ra destûr waşto ke nameyê Rojîn ser o seba cinîyan musabeqaya winasîne bikerê û nê çîyî vatî: “Keye zî bi nê çîyî keyfweş bîye. Yeno zanayene ke cografyaya ma de dayîkî hîna zaf miqateyê kênayanê xo yê la yê Rojîn Kabaîş tewr zaf pîyê aye xover da û bi têkoşînê xo yê edaletî rojeve de xeylê ca girewt. Mergê Rojîn Kabaîş mergêko biguman bi. Seba têkoşînê edaletî yê keyeyê aye û yê heme komelî ma zî waşt bi rayîrê edebîyatî nê têkoşînî gird bikerê.”
Do muracatî bi di ziwanan bibê
Olcay Çomleklî Yurdakul derheqê amadekerdişê musabeqa de nê agahîyî dayê: “Ma waşt ke heme jurîyê ma cinî bibê û ma wina zî kerd. O bîn zî ma waştêne encamanê musabeqa seba ke rojbîyayîşê Rojîn o, 20ê adare de eşkera bikerê la seba ke 20ê adare de Roşanê Remezan û Roşanê Newrozî est o, ma tarîxê encaman apey ant û kerd 14ê adar. La beno ke serranê ameyoxî de ma rojbîyayîşê aye de nê çîyî bikerê. Babeta musabeqa cinî ya. Kesê ke 18 serrî ra pîlêr ê eşkenê bi hîkayeyanê xo muracat bikerê. Bi lehçeyanê kirmanckî û kurmancî û bi tirkî eşkenê muracat bikerê. Musabeqakerdoxî do heta 31ê çeleyê 2026î bi rayîrê e-postayî bierşawê. 14ê adara 2026î de encamê musabeqa eşkera bibê û raya pêroyî reyde pare bikerê.”
‘Ma wazenê muracatî tewr zaf Kurdkî bibê’
Olcay Çomleklî Yurdakul qiseykerdişê xo wina qedîna: “Hêvîya ma o yo ke tewr zaf hîkayeyê bi lehçeyanê kurmancî û kirmanckî bêrê nuştene. Ma beşdarîyêka xurt hêvî kenê. Hêvî û înadê ma awankerdişê dinya û welatêko ke tede êdî cinî nêyenê kiştene.”
