Senatorê Fransayî Savodellî, seba ke bale bianco hêrişanê ke vera Rojawanî yê, mektubêk Wezîrê Karê Teberî yê Fransayî Jean-Nole Barrotî rê nuşt û va: “Modelê Rojawanî seba awankerdişê Sûrîye referansêk o.”
Reaksîyonê rayeyê mîyanneteweyî yê hemverê hêrişê dewleta Tirk û çeteyan ke verba cayan ke binê Rayberîya Xoserî ya Vakur û Rojhelatê Sûrîye de yê, dewam kenê. Senatorê Fransayî Pascal Savodellî, seba ke bale bianco hêrişanê ke vera Rojawanî yê, mektubêk Wezîrê Karê Teberî yê Fransayî Jean-Nole Barrotî rê nuşt. Savodellî dîyar kerd ke modelê îdareyê hîra û demokratîk ê Rojawanî ganî reyna awankerdişê Sûrîye de bibo nimûne û vengda Fransayî ke embazanê xo yê Kurdan tena nêverdo.
‘Rojawan seba awankerdişê Sûrîyeya newa referansêk a’
Senator Savodellî dîyar kerd ke rijîyayîşê rejîmê Esadî seba şarê Sûrîye hêvîyêk temsîl keno û wina vat: “Na hêvî serra 2011î de dest pê kerd û nika lutkeya şorişêk de ya ke encamê aye dîyar nîyo. Sey parçeyê nê şorişî, Kurdê Sûrîye des serran ra vêşêr o ke paştî danê projeyêka sîyasî ke xo şanena xoserîya demokratîk û heme komel pê reyde mîyanê aştî de eşkenê biciwîyê. Ewro no model, seba awankerdişê Sûrîyeya newîye ya hîra û demokratîk ke xo şanena edalet, têdûştî û heqê heme pêkameyeyan, referansêk o.”
‘Hêzê tarî Rojawanî tehdîd kenê’
Senator Savodellî, têkoşînê Kurdan ê Sûrîye de ke vera DAÎŞ’î kerda arde vîrê Wezîrê Karê Teberî Jean-Noel Barrotî û vat: “Hêzê Kurdan, bi taybetî serra 2015î de bi wesîleya hêrişanê cîhadîstan ê ke erdê Fransayî de vera şarê Fransayî ameyê kerdene, seba Fransa û koalîsyonî têkoşînê vera DAÎŞ’î de bîyê embazê erjayeyî.
Labelê, badê 8ê Kanûnê 2024î ke grûba îslamîst û zilmker Heyhet Tehrîr el-Şamî (HTŞ) Şam de hukmat girewt xo dest, bi taybetî tayê hêzê apeymende û tarî yê çekdarî ke Tirkîya paştî dana înan, cayê Vakur û Rojhelatê welatî yê de ke Kurdî tede zêde yê vera Hêzanê Sûrîyeya Demokratîk (HSD) hêrişî dayê destpêkerdene. Bi taybetî Dêrazor û Minbicî de kontrolê tayê cayan girewt xo dest. Zaf şahidê ke a herême ra ameyê anê ziwan ke şarê sîvîl yeno qetilkerdene.”
‘Nêbeno ke Fransa Kurdan tena verda’
Senator Savodellî veng da Wezîrê Karê Teberî Jean-Noel Barrotî ke ganî Fransa vera hêrişanê dewleta Tirk û grûbanê çeteyan yê ke Rojawanî ser o benê, kişta Kurdan de vindera û wina va: “Wexto ke ma girdîya hêrişanê ke vera Kurdan bigêrê çiman ver, ez wazena bipersî ke ‘Gelo, Fransa seba ke paştîdayîşê embazanê xo Kurdan û modelê înan ê îdareyê xoser yê demokratîkî bikera, prosesê sîyasî yê reyna awankerdişê Sûrîye de rayîr vera mîyankewtişê Kurdan akera û bi taybetî seba şermezarkerdişê hêrişanê xerîban ê ke prosesê parçebîyayîşî hîna zehmet kenê ke riyê Tirkîya ra vejînê meydan, do giranîyêka senîne nîşan bida?’ Nê serrdemî de ke merdim nêeşkeno rîskê karesatêka newîye ya însanî peygoş bikero, Fransa nêeşkena embazanê xo Kurdan tena verda.”
