Hunermenda kurd Eyşe Şan serrgêra 29. ya koçê xo de, mezela xo ser o ke Goristanê Yenîkoyî de ya, ameye yadkerdene. Şaredarîya Amedî ya Şaristanê Girdî , Ma Music, Komela Kultur, Huner û Edebîyatî ya Cinîyan (KASED), Konservatuarê Aram Tîgranî û Komela Kultur û Hunerî ya Dîcle, hunermenda kurd Eyşe Şan mezela aye ser o, aye yad kerd.
Eyşe Şana ke 18ê kanûna 1996î de cuya xo vîndî kerd, serê wesîyetê aye gora aye 18ê Hezîrana 2025î de ardbî Amed û Goristanê Yenîkoyî de amebî defînkerdene. Merasîmê gorî ke Goristanê Yenîkoyî yê qezaya Rêzanî de ame viraştene, tewrê keyeyê Eyşe Şan xeylê kesî tede ameyê têhet. Welatijê ke beşdarê bernameyê yadkerdişî bîyî, fotografê Eyşe Şane sîneyê xo ser o rona.
Sereka Daîreya Karê Kultur û Komelkî Zeynep Yaş merasîmê yadkerdişî qisey kerd û nê vatî: “Bi serran o ke Eyşe Şan waştêne ke tîya de bêra yadkerdene. No waştişê aye û yê her kesî bi.”
‘Wa bibo wesîleyê wayûbirayîye’
Lajê Eyşe Şan Murat Kersenî zî wina va: “Ma 29 serran ra dima dayîka xo arde serê herra aye. Tayê erey mend la şertan wina waşt. Ez Eyşe Şan emanetê şarê aye kena. Seba mi ya tewr îdeal na bî, aye bi xo zî na waştêne. Ez zaf bextewar a, cayê aye cinet bo.”
Dosta keyeyî Yuksel Avşare zî îfade kerd ke a seba caardişê wesîyetê aye zaf keyfweş a û dîyar kerd ke çar serrî û nîm o ke ê keyeyî reyde mişewrêne.
Avşar wina va: “Wa ardişê aye yê tîya, bibo wesîleyê aştî, azadîye û wayûbirayîye. Cayê aye gul û gulistan bo.”
Evîn Duleka ke MA Musicî ra ya zî bal ant têkoşînê Eyşe Şan ser o û va: “Ma Eyşe Şan tena bi deyîranê aye nê, bi têkoşînê aye yê vera sîstemê feodalî zî şinasnenê. Eyşe Şan sey hunermendêka bêmerge tarîx de cayê xo girewt. Ma zî hewl danê ke mîrasê ke aye peyê xo de veradayo, bidomnê.”
Qiseykerdişan ra dima duayî ameyî wendene û qerenfîlî ronîyayî mezela Eyşe Şan ser o.
