Serekê Baroyê Amedî Abdulkadîr Guleçî vat ke raporê AKP’yî vera ruhê prosesî yo û vat: “No proses bi vîzyonêko girde ame destpêkerdene. Ganî her kes verê xo bido yew het. Lazim o ke qanûnê entegrasyonî yê demokratîkî bêrê viraştene.”
Guleçî vat ke 14 aşmê prosesî qedîyayî û hetê Têgêrayîşê Azadîye ra gamê berçimî ameyî eştene û wezîfeyo ke Rayberê Şarê Kurdî Adullah Ocalanî da verê înan, ardê ca. Guleçî vat: “Ma resayê merheleya newîye, na merhela de lazim o ke Tirkîya gamanê şênberan bierza. Heta nika gamê şênberî zafî ameyî eştene, çekî ameyê îmhakerdene, PKK’yî xo fesih kerd. Goreyê prosesî ganî qanûnê entegrasyonî yê demokratîkî bêrê viraştene. Hem seba kesanê ke çekê xo îmha kerdê hem zî seba kesanê ke zîndanan de yê û kesanê ke vejîyayê teberê welatî, seba înan zî ganî qanûnêk bêro vejîyayene.”
Guleçî ard vîrê ke Ewropa 2014î de qanûnê “Heqê Hêvî” veto û vat: “Heqê hêvî tena vatişê Birêz Dewlet Bahçelîyî nîyo. Heqê hêvî heqê Mehkemaya Heqanê Merdiman ê Ewropa yo. Qet tu kes nêeşkeno heta peynîya emrê xo zîndan de bimano. No vera peymanê Ewropayî yo. Ganî no çî bêro vurnayene. Ganî nê prosesî de heqê hêvî êdî bêro caardene. Tena seba Birêz Ocalanî nê, seba heme kesanê ke zîndanan de manenê.”
Guleçî bale ante prosesanê vîyarteyan ê ke Ocalanî dayê destpêkerene ser o û vat ke ganî dewlete nê prosesî de zaf ciddî û hessas têbigêro û vat: “Birêz Ocalan 1993î ra heta nika kedeya girde seba aştî dano. Heme peyamê ey raşt û zelal ê. Peyaman de ey avakerdiş ê cumhûrîyetê demokratîke ano ziwan. Ewro ma dewletanê Ewropa de vînenê, sey Îspanya tena Îspanyolî çin ê, tîya de Baskî, Katalanî zî ciwîyenê. Dewleta înan zî dewleta unîter a. La mîyanê yewdewletîye de heqê şarê bînan û bawerîyê înan yenê dîyene.”
Guleçî vat ke raporê AKP’yî goreyê ruhê prosesî nîya û vat: “No rapor bi ziwanêkê negatîf nusîyayo. No çî hetkarê nêdano prosesî. La na proses bi raporêka ke AKP’yî hazir kerda nêeşkeno bêro xerabkerdene. Çunke pişt ê na prosesî de vîzyonêka girde esta. Na vîzyon hêdî hêdî yena cîya û tayê gameyî zî yenê eştene.”
