Endama Platformê Muzîkî ya Şaristanî Neslîhan Edîş seba Festîvala Muzîkî ke do 10 û 14ê kanûne de bêra kerdene, wina vengda welatijan: “Ma bi sloganê ‘Muzîk azade keno, aştî gird bena’ na festîvale kenê û ma vengdanê heme şarê xo ke beşdarê festîvale bibê.”
Platformê Muzîkî yê Şaristanî ke Wan de xebatanê muzîkî keno, do mabênê 10 û 14ê kanûne de Festîvala Muzîkî 1. organîze bikero. Do festîvale de xeylê grûbê muzîjî û deyîrbazî sehne bigîrê û deyîranê xo vajê. Sewbîna na reya ewilin a ke festîvalêka muzîkî Wan de yena kerdene. Na festîvele do bi piştgirîya şaredarîyanê Rêya Armûşî, Tûşba, Artemêtan, Komela Aryen Hunerî û Merkezê Kulturî yê Bêrîvanî yê Şaredarîya Rêya Armûşî bêra kerdene.
Endama platformî deyîrbaz Neslîhan Edîş derheqê behsê detayanê festîvale kerd û vengdayîşê beşdarîye Wanijanî rê kerd.
Neslîhan Edîş ewil behsê awankerdişê Platformê Muzîkî yê Şaristanî kerd û da zanayene ke înan no 6 aşmî yo, nê paltformî awan kerdo. Neslîhan Edîş dîyar kerd ke platform amanc keno ke muzîkjenanê Wanî bîyaro têhet û vat: “Ma do atolyeyan virazê ke muzîkjenî derheqê muzîkê dinya de, hetê teorî ra aver şîrê. 92 muzîkjenî ke Wan de manenê û heme tewir muzîkî reyde eleqedar benê, platformî de ca gênê. Amancê ma yo sereke o yo ke ma tesîrê asîmîlasyonî Kurdkî ser p biqedînê û muzîkê Kurdkî bipawê.”
‘Na festîvale do bi hewayêko kolektîf bêra kerdene’
Dewamê qiseykerdişê xo de Neslîhan Edîş behsê detayanê Festîvale kerd û da zanayene ke festîvale mabênê 10 û 14ê kanûne de ya. Neslîhan Edîş îfade kerd ke do grûbê muzîkî yê ke bi şeklê cîya xebatanê xo kenê, festîvale de sehne bigîrê û nê çîyî vatî: “Do festîvala ma bi rock, blus, dengbêjî û ûsn. û bi zafziwanî vîyara û her roje do 2 grûbî sehne bigîrê. Nê komî heme endamê platformî yê. Roja ewile ya festîvale do bi dîwanê cinîyan dest pêbikero û ez zî tede 10 cinî dîwanî de est ê. Na festîvale do bi hewayêko kolektîf bêra kerdene.”
‘Amancê ma gandarverdişê ziwanê Kurdkî yo’
Neslîhan Edîş ard vîrî ke çîyê ke komelî dîyar kenê huner, muzîk, kultur û ziwan o û dîyar kerd ke amancêko bîn ê înan o yo ke Kurdkî mîyanê komelî de gandar verdê. Neslîhan Edîş qiseykerdişê xo wina qedîna: “Ganî ma û komel cayêk de biresê yewbînan û o ca zî huner o. Na reya ewila a ke binê banê platformêkî de festîvalêka muzîkî yena kerdene. Ma hêvî kenê ke xebat û festîvalê winasînî hîna zaf û girdêr bibê. Ma bi sloganê ‘Muzîk azade keno, aştî gird bena’ na festîvale organîze kenê û ma veng danê heme şarê xo ke beşdarê festîvale bibê.”
