Tepişteyê sîyasîyê PAJK û PKK’yî ke hepisxaneyanê Tirkîya de yê, vengda heme kesan ke Şorişê Rojawanî rê wayîr bivejîyê û her ca bikerê qada xoverdayîş û serewedaritişî.
Tepişteyê PAJK û PKK’yî derheqê hêrîşanê ser o Rojawanî de mesajêk vila kerd û waşt ke her kes Şorişê Rojawanî rê wayîr vejîyo. Tepişteyî dîyar kerd ke vera hêzanê dagirkeran şerê bîyayîş û nêbîyayîşî yeno kerdiş û nîşan da ke pawitişê şorişo ke bi gonîya hezaran şehîdan ameya awankerdene, wezîfeyêko bingeyîn o.
Bi nameyê tepişteyanê PAJK û PKK’yî yê hepisxaneyanê Tirkîya de, Denîz Kayayî beyanat da. Denîz Kayayî ard ziwan ke şarê Rojawanî bi qerar o ke destkewteyanê azadîye yê Rojawanê ke bi fedayî û qehremanîyanê girdan destî de tepişîyayê, bipawê û wina va: “Ma xoverdayişê destanî yê şarê Rojawanî û embazanê xo yê cepheyan ke vera gefa qirkerdiş de xo ver danê, silam kenê; kotî de beno wa bibo ma do wefadarîya xo ya bi embazanê xo yê şehîd û domananê şarê xo yê hurmetinan xoverdayîşêko reseno serkewtişî heta peynî bidomnê.”
Denîz Kayayî ard ziwan ke felsefaya azadîye ya Abdullah Ocalanî seba şaranê Rojhelatê Mîyanênî roştîya hêvî afirnaya û Şorişê Rojawanî de bîya meşaleya azadîye û seba ciwîyayîşêko alternatîf bîya îlham. Denîz Kayayî nîşan kerd ke Şorişê Rojawanî bîyo taca serkewtişî ya têkoşîna Kurdan a 40 serran û wina dewam kerd: “Şorişê Rojawanî na îdîa û biryardarîye de ya ke problemê azadîye yê însanîye çareser bikero. No şoriş bîyo serkewtişê heme şaranê bindestan a vera modernîteya kapîtalîst. Şorişê Rojawanî serkewtişo tewr binirx o ke şaristanîya demokratîk vera şaristanîya kapîtalîst bidest visto. Serkewtişê Rojawanî, pêl bi pêl vila bi û wayîrê karakterêk o ke heme Rojhelatê Mîyanên û dinya tesîr bikero. Terso tewr zêde yê hêzanê şaristanîya kapîtalîst zî no yo. Destpêk de rêxistinêka sey DAÎŞ’î xebitnayî, plan kerd ke vera şarê ma qirkerdişî bikerê û waşt ke şorişî vînî bikerê. Êyê ke bi xoverdayişê bi heybet ê şarê ma binkewtê, şexsê DAÎŞ’î de hêzê qirkerî bî.”
Denîz Kayayî, tewr peyên ard ziwan ke sey Tepişteyê PKK û PAJK’ê sey her tim ewro zî amade yê ke seba şarê xo yê hurmetin her çî bikerê û va: “ Ma xoverdayîşê Kobanî de wezîfeya xo arda ca, wa şika kesî çin bo ma do ewro zî eynî çî bikerê. Sey tepişteyan sere de keyeyê ma yê xoverdayoxî, ma veng danê ciwananê fedayîyê Rayber Apo û şarê xo yê welatparêzî ke ma wayîr Şorişê Rojawanî rê wayîr vejîyê; ma her ca bikerê qadê xoverdayîşî û serwedaritişan gird bikerê. Reyna ma her kesê ke seba pawitişê Şorişê Rojawanî têkoşîyeno, silam kenê û hêzanê dagirker û koledaran zî lanet kenê.”
