Serçeteyê DAIŞ’î ke kombîyayîşê DYA’yî yê Colanîyî ra dima qerqizyayî, kombiyayişanê de ke HTŞ’yî reyde kerdî, vera şarê elewî û durzî planê qirkerdişî yê neweyî kerdî.
Hukmatê Colanîyî ke wazeno vera HSD’yî (Hêzê Sûrîyeya Demokratîke) qada mîyanneteweyî de qerteyê DAIŞ’î bigêro xo dest, kombîyayîşê DYA’yî de beyan kerdbi ke tewrê koalîsyonê têkoşînê vera DAIŞ’î bîyê. Serê naye ra warê Sûrîye de serçeteyê DAIŞ’î ke destê MÎT’î ra ameyê organîzekerdene, heyetêkê grûba Asayîşê Pêroyî yê HTŞ’yî reyde ameyî têhet.
Goreyê xebera Lekolin.orgî, 18ê Teşrîna Peyêne ya 2025î de, 90 km rojhelatê Palmira (Tedmur) de qezaya çolî ya Suxnê (As Sukhne) de, heyetêkê hêzanê Asayîşê Pêroyî yê hukmatê Şamî, serçeteyê DAIŞ’î û eşîra xocayî ya sexte (eşîra Bedû) mîyan de kombiyayişêkê astê berze yê nimiteyî ame kerdene.
Kombiyayîşî de hêzê Asayîşê Pêroyî yê HTŞ’yî ke bi telîmatanê MÎT’î tewrê ci bîyê, serçeteyanê DAIŞ’î ra waşt ke vera dewamkerdişê estbîyayîşê xo yê Sûrîye de, pêroyîya Sûrîye de xususî herêmanê elewî, durzî û kurdan de hêrişanê bombayinan plan bikê. Semedê arêdayîşê çeteyanê DAIŞ’î yê teberî yê sey uygur, çeçen û ê bînan, herêma El-Qisêr (El-Qusayr) ke hewzê Humusî û sînorê Lubnanî ra teyna 15 km dûrî ya, ameyê kerdene.
Kombîyayîş bi zatî hetê Fermandarê Tumena 74. ya HTŞ’yî Amîd Cemîl el-Salihî ra ame organîzekerdene.
Sazgeh û Merkezê Tumenê 74.
Sûrîye de dima ke rejîmê Beşar Esadî Kanûna 2024î de kewt, hukmato vîyarteyî ame ronayene. Tumenê 74. ke yewîyanê Artêşa Sûrîyeya Newîye ya Wezaretê Pawitişê Millî ra tewr zaf ser o nîqaş beno, bi entegrasyonê çeteyanê teberî û ê kokê xo Heyet Tehrîr eş-Şam (HTŞ) ra yê, bal anceno. Nê tumenî de texmînen 2 hezar-3 hezar çeteyî estê û se ra 60ê nînan çeteyê teberî (bîyanî) yê. Tumen hem operasyonanê asayîşê zereyî de hem zî xebatanê îstîxbaratî yê sînorî de rolêko aktîf kay keno.
Merkezê înan serê rayîrê Lazqîye de dewa stratejîke Deyr Şimêl de yo ke bakur-rojawanê wîlayetê Hama de manena. Deyr Şimêl, sey baregehê lojîstîk û perwerdeyî yê tumenî xebitîyeno.
No Tumen zafêrî endamanê çeteyanê bîyanîyan ra yeno pê; tirkê Uygurî yê Tirkîstanê Rojhelatî, Çeçenî, uygurê Çînî û ê bînî ke kokê xo Kafqasî ra yê, beşêk zî çeteyê tirkmen î. Dorûverê bendê Deyr Şimêlî de semedê nê çeteyanê bîyanîyan kampekê taybetî esto.
Baregehê înan o gird o diyîn zî hewzê Misyafî de yo ke mîyanê Hama û Humusî de maneno, awanîya ke serçeteyanê kehanan ra Suhayl Hasanî xebitnayêne. Nika na awanî de çeteyê DAIŞ’î yê payeberzî ke eslê xo Urdunî ra yê, yenê arêdayene.
Eynî roje yanî 18ê Teşrîna Peyêne de tayê çeteyê DAIŞ’î yê payeberzî sînorê Urdun û Tirkîya ra bi rayîranê taybetan kewtê Sûrîye û herêmanê binê kontrolê HTŞ’yî de semedê hukmatê Colanîyî ameyê arê.
Zîyaretê Colanîyî yê DYA’yî DAIŞ da hereket
Zîyaretê peyên yê Colanîyî yê DYA’yî û Peymana “vera DAIŞî operasyono hempar” ê ke Washingtonî reyde ame kerdene, musneno ke serçeteyê DAIŞ’î qerqizyayî. DAIŞ fikirîyeno ke Colanî semedê pakkerdişê “unsuranê telukeyî” yê zereyê xo, DYA ra destûr girewto. Coka çeteyê DAIŞ’î, semedê ganîmendişî HTŞ’yî reyde peyê peymanêka “adirbest” ya lezûbeze de yê. Heyetê asayîşê pêroyî yê HTŞ’yî ke goreyê telîmatanê MÎT’î hereket keno, na rewşî zanena, coka plan keno DAIŞ’î goreyê menfaatanê xo sey silgirêkê qirkerdişî ware de bixebitno.
