Dewijanê dewa Husika ya girêdayeyê Çinarî ke vera talankerdişê herra xo vindenê dîyar kerd ke wa şîrket û dewlete destanê dewa înan ser o biancê û vat: “Ma bikişê zî ma kananê madenî qebul nêkenê.”
Şîirketê madenî wazenê dewa Husika ya qezaya Çinara Amedî de kananê madenî awan bikerê. Şîrketê bazirganîye bi serran o koyanê dewe talan kenê. Dewijî verea talankerdişê xover danê. Tewr peyên leşkeran seba menfatê şîrketî 25ê teşrîna peyêne de eşt dewe ser o. Dewijî vera ney vindertê û dest bi çalakîya nobetî kerde. Dewijan derheqê eştişê dewe ser o reaksîyonê xo ma rê îfade kerdê.
‘Destanê xo dewa ma ra biancê’
Dewijê bi nameyê Hasan Turgayî dîyar kerd ke nêzdîyê 500 leşkeran eşt dewe ser o û vat: “Nêverda tu kes dewe ra vejîyo. Keyeyê dewijan girê ver de yê. Wazenê nê girî talan bikerê. Do vera talankerdişê xoverdayîşê ma dewam bikero. Heta peynî ma do tîya de bibê. Ma hi weyekerdişê heywanan debara xo kenê. Wa her kes paştî bido ma. Ewro tîya talan bikerê, do siba zî cayêko bîn talan bikerê. Ma vengdanê şîrketî ‘wa destanê xo dewa ma ra biancê.’ Ma nêverdanê dewa ma talan bikerê.”
‘Ma bêrê kiştiş zî ma qebul nêkenê’
Dayîka bi nameyê Ayten Turgay zî dîyar kerd ke dorpêçkerdiş û qedexekerdişê dewe nêyenê qebulkerdene û wina qisey kerd: “Ez nêweş a. Nêverdanê ez dewe ra vejîya. Gor û goristanê keyeyê mi nê girî de yo. Na herra ma ya. Ma bêrê kiştene zî ma madenî qebul nêkenê.”
‘Wa herra ma ra fek veradê’
Hemserekê DBP’yî yê qezaya Çinarî Mehmet Şîrîn Demîrî zî îfade kerd ke ewro seba paştî bidê dewijan ameyê dewe û vat: “Seba kesêkê zengîn bikerê, herêma ma talan kenê. Dewijî bi weyekerdişê heywanan debara xo kenê. Wazenê xoza talan bikerê. Bi seyan leşkerî ameyê dewe û dewijî tehdît kerdê. Ma na herême de kesê ke wazenê herêma ma talan bikerê, ma înan nêwazenê. Wa herra ma ra fek veradê. Heta peynî ma do dewijan reyde bî.”
