Gulîstan Kiliç Koçyîgît derheqê darbeya sîyasî ya 4ê teşrîna peyêne vernîya Hepisxaneyê Sîncanî de qisey kerd û îfade kerd ke ganî îqtîdar goreyê prosesî têgêro û vat: “Dewaya Kumpasî ya Kobanî herimîyaya, embazanê ma veradê.”
Partîya Têduştî û Demokrasî ya Şaran (DEM Partî) derheqê serrgêra darbeya sîyasî ya vera Partîya Demokratîk a Şaran (HDP) ke 4ê teşrîna peyêna ya 2016î de ameye kerdene, vernîya hepisxaneyê Sîncanî yê Anqara de eşkerayî daye. Serekwekîlê Grûba DEM Partî Gulîstan Kiliç Koçyîgît û Sezaî Temellî, Parlamenterê DEM Partî, endamê Komîteyê Rayberîya Merkezî ya DEM Partî, rayberê rêxistinanê DEM Partî yê Anqara û endam û temsîlkarê sazgehanê demokratîk beşdarê eşkerayî bîyê.
‘Na dewayêka herimîyaye ya’
Gulîstan Kiliç Koçyîgît eşkerayî de îfade kerd ke ê vera darbeya sîyasî reyna tîya de vengê xo berz kenê û vat: “Embazê ma dewaya Kobanî de bi hewayêko bêhuqûqî ameyê girewtene. Se serrî zî na dewa ser o ra vîyarê, a dewayêka herimîyaye ya û do wina bêra pênasekerdene. Ne embazê ma ne zî ma teslîmê bêhuqûqîye nêbîyê. Embazê ma nêameyê muhakemekerdene, embazê ma mehkemayî muhakeme kerdê û ê îfşa kerdê. Mehkemaya Heqanê Merdiman a Ewropa zî na dewa sey binpaykerdişê heqan pênase kerde û wina qerar da. DMME’yî waşt şexsê Selahattîn Demîrtaşî de heme embazê ma veradîyê. Ganî qerarê DMME’yî bêro ca.”
‘Qerarê DMME’yî bîyarê ca’
Gulîstan Kiliç Koçyîgît dîyar kerd ke şar û aştî o yo ke îqtîdar goreyê huqûqî têgêro û nê çîyî vatî: “Eke huqûqêko newe nêro awankeredene û aştî bêra awankerdene, no nêbeno, ganî ewil huqûq bêro ca. Qerarê ke seba embazanê ma ameyê dayene ganî bêrê ca. Gelo ganî Mehkemaya Heqanê Merdiman a Ewropa çend reyî qerar bida ke embazê ma veradîyê? Ma reyna tîya de vanê embazê ma yê ke tîya de girewte yî rûmetê ma yê. Bi veradayîşê înan ma do Prosesê Aştî û Komelê Demokratîkî awan bikerê. Heta embazê ma veradîyê do têkoşînê ma dewam bikero. Dewaya Kumpasî ya Kobanî herimîyaya, embazanê ma veradê.”
