Platformê Sazgehanê Demokratîk derheqê hêrişê grûbêka kesanê selefî yê vera hîrê cinîyan eşkerayî daye. Kesê ke nameyê platformê ser o qisey kerd dîyar kerd ke bêexlaqîya ke ameya kerdene, şermezar kenê û dîyar kerd ke tarzo ke cuya merdiman hedef gêno, nêyeno qebulkerdene.
Şewa 1ê teşrîna peyêne qezaya Sûr a Amedî de nêzdîyê 20 kesê selefî yanî dînperestî hêrişê keyeyo ke hîrê cinî tede mendêne, uca de hêrişê înan kerd. Na grûbe selefî şîya keyeyê cinîyan û ê tehdît kerdê. Platformê Sazgehanê Demokratîk derheqê hedîse de Camîyê Nebî yê qezaya Sûr a Amedî de eşkerayîya çapemenî daye. Hemşaredar û temsîlkarê platformî zî tede xeylê kesî beşdarê eşkerayî bîyê. Girse sloganê “Jin Jîyan Azadî” , “Bijî berxwedana jinan” û “Bê jin jîyan nabe” vatî.
‘Wa kes bekçîtîya exlaqî nêkero’
Eşkerayî de ewile Hemsereka Partîya Têduştî û Demokrasî ya Şaran (DEM Partî) ya Amedî Gulşen Ozer qisey kerd. Gulşen Ozer da zanayene ke hêrişê vera cinîyan hîrê rojî ra ver Taxa Dabanoglu ya qezaya Sûr de ameyo kerdene û wina vat: “Tayê kesê ke bi mezgê DAIŞ’î têgêrenê embazê cinî derb kerdê. Vîrê Sûrî xurt a, bi serran o bi desan şaristanî û milet pîya ciwîyenê la kes mudaxeleyê cuya kesan nêbeno. La nika 10-15 camêrdî hêrişê hîrê cinîyan kenê. No kamcîn dîn û bawerî de est o? Tu merdim nêeşkeno mudaxeleyê cuya kesî bibo. Ma sey TJA nê zilmî û nê exlaqî lêmin qebul nêkenê. Ma înan ra zafêr dîndar ê û dîn dînê ma yo zî.”
Gulşen Ozer dîyar kerd ke kes nêeşkeno zereyê Sûr de bêexlaqîye bikero û wina domna: “Ê destê ke dergê cinî benê wa bişîkîyê, ê çimê ke bi hewayêko nebaş cinîyan ra ewnîyenê wa vejîyê. Ma sey TJA nê zilmî qebul nêkerê, şermezar kenê û ma do vera nê têkoşîn bikerê.”
‘Tarzo ke cuya merdiman hedef gêno nêyeno qebulkerdene’
Dima Hemsereka Partîya Herêman a Demokratîke (DBP) ya Amedî Rûçem Elyakut zî eşkerayîya bi tirkî wende. Rûçem Elyakut dîyar kerd ke nê rojanê de ke awankerdişê komelê demokratîkî yeno nîqaşkerdene, tu nêzdîbîyayîşê ke tarzê cuya merdiman, bawerî û nasnameyê înan, azadîye û heqê înan hedef gêno, nêyenê qebulkerdene. Rûçem Elyakut dîyar kerd ke sere de şîdetê vera cinîyan do hemverê her tewir nêzdîbîyayîşanê şîdetê komelî afernenê, bi hewayêko çalak xover bidê û vat: “Ma do kulturê cuya pîya ke seserrî yo dewam keno, bidomnê û bipawê. Ma do desstûre nêdê ke nêzdîbîyayîşê asîmîleperest ke cîyayîyan sey sebebê cîyakarî vînenê.”
