Dayîkê Şemeyî aqûbetê Yusuf Nergiz ke 28 serrî verê cû destbendkerdişî de amebi vînîkerdiş persayî û vatî ke heme muracatanê ke keyeyî heta nika kerdî bênetîce mendî.
Dayîkê Şemeyî semedê perskerdişê aqûbetê kesanê ke destbendkerdişî de ameyî vînîkerdiş û qetilkerdiş û kerdoxî bêrê muhakemekerdiş, hewteyê 1074ine yê çalakîya xo ya hewteyî de Meydanê Galatasarayî de ameyî têhet. Çalakîya ke zaf kesî tewrê bîyî de, Dayîkê Şemîye no hewte aqûbetê Yusuf Nergizî (70) ke destbendkerdişî de ameyo vînîkerdiş persayî.
Merdimê Şemeyî ra Oya Ersoye hîkayeyê vînîbîyayîşê Yusuf Nergizî va: “Yusuf Nergizo 70 serre, babîyê şeş tutan bî ke taxa Ofîse ya Amedî de ciwîyayîne. Semedê ramitişê zîyanê xo dewa Tiyaksî ya qezaya Pasûrî de ameyîş-şîyayîş kerdêne. 30ê êlule 1997ine de, leşkeran eşt keyeyê Yusuf Nergizî yê dewe ser û destbend kerdî û berdî Fermandarîya Cendirmeyan ê Merkezî yê Pasûrî. 3ê teşrîna verêne 1997ine de ame tehlîyekerdiş. Dimayê tehlîyekerdişî, ey telefonê cinîya xo kerd û çîyê ke qewimîyayî va. Nergiz semedo ke şêro keye, şi xeracê mînîbusan ê Amedî. Uca ca de raştê waya xo ame. Çîyê ke ciwîyayo qal kerd û va ke ey semedê mînîbusa ke plakayê ci 21 AR 474 û ganî saete 11:00ine yê sibayî amade bo, bilêtek girewto. Wexto ke Yusuf Nergiz nêgêra keye, keyeyê ey dest bi cigêrayîşê ey kerd. Cinîya ey Şahibe Nergiz ke pêhesîya Yusuf û qorîcîyê dewe Alaeddîn Şahîn eynî mînîbuse de yê, xo resna qorîcî. Şahînî dîyar kerd ke Yusuf Nergizî mînîbuse ardê war û semedê kontrolkerdişê nasnameyî ey berdê Qereqolê Cendirmeyan ê Zeyrekî.
Oya Ersoyî wina qal kerd: “Şahibe Nergiz 7ê teşrîna verêne 1997ine de derheqê vînîbîyayîşê mêrdeyê xo de muracatê Dozgerîya Amedî kerd û gerreyêk kerd. Mudîrîyeta Polîsan ê Amedî û Fermandarîyê Cendirmeyan ê Qezaya Pasûrî, dozgerî rê neql kerd ke Yusuf Nergiz herêma înan de nêameyo destbendkerdiş. Dozgerî cipersayîş dest pêkerd û qerarê cigêrayîşî da. La, no proses ra tu netîce nêgirewt. Nergiz, Pasûr de destbendkerdiş de vînî bi. Keyeyê ey 28 serrî yo hewl dano ke çarenûsê ey bizano û edalet wazeno. La, no cigêrayîşê edaletî, sey hîkayeyanê vînîbîyayîşanê bînan ê ma, bêvengîya dewlete û polîtîkayanê bêcezakerdişî ra bênetîce mend. Çiqas serrî derbaz bibê zî, ma do waştişê edaletî semedê Yusuf Nergizî, semedê heme vînîbîyayîşanê xo fek vera nêdê.”
