33 serrî ra ver Gulnaz Karataş (Bêrîtan Hêvî) vera hemkarîya PDK û YNK’yî şer kerd û dima ke guleyê aye qedîyayê, çekê xo şikna û xo zinarê Lêlikan eşt war. Rayberê Şarê Kurdî Abdullah Ocalan seba çalakîya aye vano, ‘Çalakîya aye çalakîya eşq û rûmetî ya.’
Rayberê Şarê Kurdî Abdullah Ocalan seba Gulnaz Karataş (Bêrîtan Hêvî) tesbîtê ‘Çalakîya aye çalakîya eşq û rûmetî ya’ kerdbi. Bêrîtan Hêvî sey şorişgir vera îxanetî mohrê xo da tarîxê kurdan. Bêrîtan Hêvî serra 1971 de qezaya Solxan ya Çewlik de ameya dinya. La eslê xo Dêrsim ra ya.
Pîyê Bêrîtan seba ke karmend o xeylê şaristananê Tirkîya û Kurdîstanî ra gêreno. Hema ke geda ya hedîseyê komelkî û tarîxî bala aye ancenê. Nakokîyê cuya şarê kurd û cinîyan ser o bala aye ancenê. Demo ke Stenbol de unîversîte wanena, ciwananê welatparêzan nas kena. Dima ke ciwanan naa kena, hîna zaf beşdarê xebatanê ciwanan bena. Her tim kewt cigêrayîşê xo naskerdişî.
Şinasnayîşê ciwanan ra pey Stenbol ra verê xo dana Cûdî. Wisarê 1991 de beşdarê refanê gerîla bena û uca ra vîyarena koyanê Xakurkê. Dima ke beşdarê PKK’yî bîye, vat: “Şer heqê her gerîlayêka cinî yo. Her gerîlayêka cinî wayîrê heqî ya ke beşdarê şerî biba.” Dima beşdarê çalakîya Qereqolê Rubarokî bena. Çalakîya vera qereqolî de birîndar bena.
Serra xo ya dîyine de bi çalakîya xo ya Apoyî sey milîtana Apoyî yena naskerdene. O wext artêşa Tirkîya serra 1992 de operasyonê leşkerî yê ‘operasyonê teberê sînorî” dabi destpêkerdene. La encam o ke waştêne nêgirewt. Dewleta Tirkîya ey ra pey 4ê teşrîna verêne de operasyon hîra kerd. Peşmergeyê PDK û YNK’yî zî beşdarê operasyonî kerdê. La vera ney gerîla şerêko zehmet kerd. Heftanîn de têkoşîn bi pêşengîya fermandara cepheyî Azîme (Mîhrîban Saran) bi serkewtiş ame girdkerdene. Nê operasyonî de Bêrîtan Hêvî zî cepheyê Xakurkê de vera leşkeranê tirk û peşmergeyanê PDK û YNK’yî şer kerd. Vera xeta hemkar û teslîmbîyayîşî heta peynî xover da û teslîm nêbîyê.
Roja 25ê teşrîna verêne ya 1992 de Bêrîtan Hêvî mewzîyê xo de heta peynî vera PDK û YNK’yî şer kerd. Dima ke guleyê aye qedîyayê, çekê xo şikit. Seba ke ganî nêkewa destê înan, xo Zinarê Lêlikanî ra erzena û xo kişena. Demo ke peşmergeyê PDK’yî aye ra vanê ‘teslîm bibe, ma çîyêk nêkenê to’ Bêrîtan Hêvî a game qerarê çalakî dana. Aye teslîmîyetî sey bêrûmetî, bêrûmetî zî sey mergî pênase kerdêne.
Bêrîtan Hêvî bi slogan û tîlîlîyan zo zinarê Lêlikanî ra erzena war û çalakîya xo kena.
Na çalakî ra pey têgêrayîşê cinî û sazgeyê kurdan 33 serrî yo aye yad kenê û sozê xurtkerdişê têkoşînê aye danê.
