Kaybazê Tîyatroyî Alîşan Onlu ke 30 serrî yo ke tîyatro reyde eleqedar beno, behsê prosesê xo yê kaybazîya tîyatroyî keno û muhîmîya bi kirmanckî kaykerdişê tîyatroyî ser o zî wina vano: “Wazena bi kirmanckî kay bikerî. 2016î de dewlete komelê ma girewtê û nêverda ma zonê xo kirmanckî de kay bikerîme. Ma dest de çi bi, ma ra girewt.”
Alîşan Onlu ke qezaya Qişlê ya Dêrsim ra yo, 30 serrî yo tîyatro ser o xebitîyeno. Ewilî Merkezê Kulturî yê Mezopotamya (NÇM) de dima Teatra Jiyana Nû de xebetîyayo. Embazanê xo reyde atolyeya Seyr-î Mesele awan kerda û bi serran pîya kaybazîya tîyatroyî kerda. Alîşan Onlu ma rê behsê kaybazîya tîyatroyî û tîyatro de muhîmîya ziwanê kirmanckî kerd.
‘Ez wazena bi kirmanckî kay bikerî’
Alîşan Onlu verê ma rê behsê destpêkê kaybazîya xo ya tîyatroyî keno û dîyar keno ke dima dewlete komela înan padaya embazanê xo reyde Atolyeya Seyr-î Mesele akerda û dest bi kaybazîye kerda û wina dewam keno: “Seyr-î Mesel de hetêk ra kirdaskî hetêk ra zî kirmanckî bi. Ez wazena bi kirmanckî kay bikerî. 2016î de dewlete komela ma girewte û nêverda zonê kirmanckî de karê xo bikerîme. Ma dest de çiyê ke bîyê, pero ma girewtê. Dima ma bese nêkerd cayo bîn akerê. Ma Seyr-î Mesele de ma bi kirmanckî Sayê Moro, Qal û Qir kaykerdîme. Sayê Moro de ma sanîk çarnaye tîyatro. Hete ra îtîqatê ma, hete ra zonê ma de çîyêde rînd bi. Seyr-î Mesel ke padîyaye ez sehne ra biney dûrî kewtîme. Demê pandemî ra ver ez û rejîsorê xo ma dest bi kayê Azîz Nesînî ‘Çîçu’ kerd. 2 serrî ma çarna zonê xo. Ma waşt kirmanckî de testêko muhîm bibo. La reyêk de pandemî bi û her ca padîya û o kay nêmcet mend.
La mi waşt kirmanckî kay bîkerî, kirmançkî de klasîk şano çin bi. Tayê kay kenê la tena sey ‘parado’ maneno. Nafa kî kayê şîye ser karê kerdî. Dî tene kuklayî est ê, vengê xo vurnenî…Reyna nêbi.Sanikê ma est ê, mi waşt bi sanikan xebatêk bikerî.”
Alîşan Onlu ma rê behsê sanikanê ke hem bi veng hem bi dîmen kerdê kaye, behsê înan keno.
‘Zono ke pê sanikî nêvajîyê, beno vîndî, sono’
Alîşan Onlu derheqê muhîmîya sanikanê ziwanî keno û wina vano: “Sanîkî yê welatî yê, her zon sanikê xo est ê, eke ê nêvajîyê, benê vîndî sonê. Sanîkê qesey kersene zere keye de beno. Verê ma û pîyê ma ke zonê ma de sanîkî qesey kerdene.
‘No zon maya ma deyn dayo ma, ma ganî bimusnê domananê xo’
Alîşan Onlu vatena xo ya peyên de dîyar keno ke ziwanê ma, ma rê ma û pîy^ema ra sey deyn mendo, ganî ma domananê xo bimusnê. Zonîk henî yo. Zono ke tewer de, mekteb de qesêy nebi beno vîndî. La ma destî ra çi ame ma bikerê. Kay bibo kay, deyîrbazî bo deyîrbazî.”
