Serekê Baroyê Wanî Sînan Ozarazî vat delîlê neweyî dosyaya Rojîn Kabaîşe de îhtîmalê hêrîşê cinsî xurt kenê û vat: “Êdî xokiştiş ney, îhtîmalê qirkerdişî xurt bîyo.”
Sînan Ozarazî vat cêko ke Rojîne ameya Wan û heta vindîbîyayîşî, her kesê ke têkilî ronaya ganî DNA’yê înan muqayese bibo, îfadeyê înan bêro girewtene. Dezgeh û raydarî ke îhmal yan qisûr kerdo, ganî prosesê qanûnî seba înan dest pêbikero.
Wendekare Rojîn Kabaîşe 27ê êlûle 2024 wargehî ra vejîyaye, 18 rojan ra dima 15ê teşrîna verêne qeraxê Molla Qasimî de meyîtê aye ame dîyene. Sazgeha Tipê Edlî (ATK) verî vat “tecawûz çin o,” serrêk ra dima 10ê teşrîna verêne de raporêko newe weşana û tede vat laşê Rojîne de DNA’yê di camêrdan dîyayo – yew sêne de, yew mintiqaya vajîna de.
Sînan Ozarazî vat ATK’yî numûneyî şawitbî labelê melumatî eşkera nêkerdbî: “Teqrîben aşmêk ra ver ma seba ATK’yî îlanê sucdarîye kerd ke delîlan nêdanê raya pêroyî. Hema newe a roje rapor resayo dosya. ATK’yî cipersayîş asteng kerd.”
Serekê Baroyî vat destpêk ra cipersayîş sey xokiştiş ameyo kerdene, no xelet bî. “Di DNA’yê camêrdan mintiqayanê cinsîyan de ameyî dîyene. No eşkera mojneno hêrîşêko cinsî ganî bêro cipersayene. Îhtîmalê qirkerdişî xurt bîyo.”
Sînan Ozaraz peynî de vat seba têkoşînê pîyê Rojîne Nîzamettîn Kabaîşî û xebatanê Baroyanê Wan û Amedî dosya nika resaya na merhele. “Ma do têkoşînê adaletî dewam bikerê.”
