Verfekê Platformê Astengdaranê Çewlîgî Murat Belgînî, semedê Roja Emniyetî ya Bastonê Sipêyî yê Astengdaranê Çiman eşkerayîyêk da û va ke Çewlîg de semedê çareserîya cuyeya astengdaran game nêerzîyenê, şaredarîye, konseya şaristanî û dezgehê eleqedaran wezîfeyê xo nêanê ca. Belgîn veng da rayedaran ke wa wayîrê mesulîyetê xo bivejîyê.
Platformê Astengdaranê Çewlîgî, semedê Roja Emniyetî ya Bastonê Sipêyî yê Astengdaranê Çiman eşkerayîyêk da. Verfekê Platformî Murat Belgînî ke bi nameyê platformî qisey kerd, hem derdê ke astengdarî şaristan de ancenê ard ziwan, hem zî rexneyî kerdî ke problemî nêyenê çareserkerdene.
‘Verê îşxalê peyarayîran de çareserî nêvîrazîya’
Belgîn eşkerayîya xo de bale ante ser ke herçiqas çend kontrolê Şaredarîya Çewlîgî yê verênî semedê îşxalan hêvî dabî zî, no proses bêwayîr mendo û wina va: “Herçiqas çend kontrolê Şaredarîya Çewlîgî yê vera îşxalanê peyarayîran hêvî dabî zî, nê prosesî dewam nêkerd. Halbûkî xeylêk şaristanan de gameyî cîdî ameyê eştene û verê îşxalan heta dereceyo gird girewt. Resayîşî de dewamî esas a; Şaredarîya Çewlîgî no mesulîyetê xo nêana ca.”
“Peyarayîrê neweyî weş ê la astengdarî nêeşkenê bişuxulnê”
Belgîn da zanayene ke karê ray û peyarayîran ê ke nezî de şaristan de ameyê viraştene, goreyê standardanê astengdaran nîyê û wina domna: “Ray û peyarayîrê ke newe ameyê viraştene, herçiqas asayîşê înan weş bo zî, semedê şuxulnayîşê astengdaran musaît nîyê. Kerrayê raynîşandayîşî yê semedê astengdaranê çiman şaş ameyê rakerdene, rampayî teberê standardan de yê. Şaredarîye, projeyan de fikrê ma nêpersena û goreyê zerrîya xo tetbîq virazena. Netîce de, ca de ke cuya astengdaran asan bikerê, tam tersê ney, cayî virenî ke cuya astengdaran kenê zor.”
“Merkezê Cuyê Bêastengî bêfonksiyon o”
Belgîn îfade kerd ke Merkezê Cuyê Bêastengî û Mudirîya Cuyê Bêastengî yê girêdayeyê Şaredarîya Çewlîgî, qet yew xizmet nêdanê û wina qedîna: “Qet yew faydeyê Merkezê Cuyê Bêastengî yê Şaredarîya Çewlîgî semedê astengdaran çin o. Tenya rojanê sembolîkan de çend çalakîyî yenê viraştene, wextê bînê serre de qet yew fealîyet nêbeno. Mudirîya Cuyê Bêastengî ro caran de qet yew xebata xo çin a. Na yewîya mewcûde, heta çaryekê komeleyanê sîvîlan ê şaristanê ma zî kar nêkerdo. Nê sebebî ra ma wazenê ke cayê rayedarê mewcûdî bêro bedilnayene û kesê ke ehîl û karê xo de zanaye yê, bêrê wezîfedar kerdene. Xeta telefonî ya 153’î ya ke Şaredarîya Çewlîgî semedê arêkerdena muracetanê welatîyan viraşta, wezîfeyê xo nêana ca. Telefonê ke hetê astengdaran ra yenê kerdene rê cewab nêdîyeno, semedê problemanê ke yenê vatene çare nêvînîyeno. Na xete ganî yew şaxî ke vengê welatijan bieşnawitîyêne, la bîya bêfonksiyon. Konseyê Şaristanî zî rolê xo kay nêkeno û otobusê şarî yê xususî yê ke şaristan de xebetîyenê, heqanê seyahatî yê astengdaran îxlal kenê.”
