Rayîrşîyayîşê TJA’yî roja diyîn hîrêyîn de resa dewa Amara. Parlamentera DEM Partî Bêrîtan Guneş Altin ke beşdarê rayîrşîyayîşî bîya, qisey kerd û dîyar kerd ke do cinîyî bi vindertişê xo encamê nê prosesî dîyar bikerê û vat: “No rayîrşîyayîşê ma yo tarîxî do encamî dîyar bikero û birêz Ocalanî azad bikero.”
Têgêrayîşê Cinîyanê Azadan (TJA) bi sloganê “Ma bi hêvî ver bi azadîye şonê” 1ê teşrîna verêne de Amed ra ver bi Anqara rayîrşîyayîş da destpêkerdene. Rayîrşîyayîş roja hîrêyîne de qezaya Xelfetî ya Riha de dewam keno. Cinîyî k ameyê awanîya Rêxistina Partîya Têduştî û Demokrasî ya Şaran (DEM Partî) a Xelfetî de kom bîyê, tîya de deyîrî vatî û sloganê “Jin Jîyan Azadî, azad bike Raybertî” û “Bijî Serok Apo” vatî. Dima cinî ver bi dewa Amara ke Rayberê Şarê Kurdî Abdullah Ocalan tede ameyo dinya, rayîr kewtê. Cinî bi coş û heyecan û bi vatişê sloganan resayê dewa Amara. Cinî dewe de bi slogan û çepikan ameyê pêşwazîkerdene. Cinîyî ke bi sloganan kewtê baxçeyê keyeyê Rayberê Şarê Kurdî Abdullah Ocalanî hetê birayê ey Mehmet Ocalan û merdimanê ey ra ameyê pêşwazîkerdene. Baxçeyê banî de postero gird ê Abdullah Ocalanî û pankartê TJA’yî yo ke ser de “Em bi hêvî ber bi azadîye ve dimeşin” û “Jin Jîyan Azadî” ameyêne nuştene, ameyê aliqnayene. Cinîyan verê keyeyî de bêmabên sloganê ke sozdarîya înan ê seba Abdullah Ocalanî vatî.
‘Têkoşînê şima pîroz o’
Mehmet Ocalan ewilî qisey kerd, sipasîya cinîyan kerd û vat: “Şima heme xêr ameyê. Têkoşîno ke şima danê pîroz o. Heme çî bi kede û têkoşînê dest keweno. Ma sipas kenê sipas kenê, rayîrê şima akerde bo, serkewtiş şima rê.”
Dima Parlamentera DEM Partî ya Mardînî Bêrîtan Guneş Altin qisey kerd.
‘Ewro waştişê azadîya birêz Ocalanî hewt qitayan ra vîyarto’
Bêrîtan Guneş Altin bale ant pêvînayîşê Îmraliyî yê ewroyîne ser o û vat ke ma silamanê xo Abdullah Ocalanî rê erşawenê. Bêrîtan Gunes Altin dîyar kerd ke manayê Amara seba şarê kurdî xeylê gird o û wina vat: “Ma şehîdanê Amara anê xo vîr. Ma bi saya înan tîya de yê.” Bêrîtan Guneş cinîyanê enternasyonalîstan rê zî silamî erşawitî û wina domna: “Pêroyê cinîyanê enternasyonalîst ke azadîya birêz Ocalanî wazenê, ma înan silam kenê. Ewro waştişê azadîya birêz Ocalanî hewt qitayan ra vîyarto, vila bîyo. Azadîya birêz Ocalanî têkilîyêka heyatî û şaran a.”
‘No rayîrşîyayîşê ma yo tarîxî do encamî dîyar bikero’
Bêrîtan Guneş Altin dîyar kerd ke waştişê înan o sereke azadîya fîzîkî ya Ocalanî ya û wina dewam kerd: “Êdî ma azadîya fîzîkî ya birêz Ocalanî wazenê. Hema zî heqê hêvî kenê babeta nîqaşî, ganî şima bîyarê ca. Cinî do bi vindertişê do encamê nê prosesî dîyar bikerê. No rayîrşîyayîşo tarîxî do encamî dîyar bikero û birêz Ocalanî azad bikero.”
Perspektîfê Abdullah Ocalanî ame wendene
Qiseykerdişê Bêrîtan Guneş Altin bi sloganê “Jin Jîyan Azadî” qedîya. Dima aktîvîsta TJA’yî Fatma Ablay beşêkê perspektîfî “Aştî û Komelê Demokratîkî” ê Rayberê Şarê Kurdî Abdullah Ocalanî wend.
Dima cinîyan bi komî fotograf antê û sloganê “Bijî Serok Apo” vat. Cinî do Amara ra ver bi qezaya Bêrecûkî rayra şêrê û dima vîyarê Dîlok.
