Mamekîye de yew kokime esta ke, nameyê xo Leyla Guven a. Nika Gazike de kênaya xo reyde ronişena. Guven verê banê xo de qaytê dormê xo kena û ma rê behsê serebûtanê xo yê 38, 94 û Kore kena.
Keso ke zereyê Mamekîya Dêrsim ra bifetelîyo, serê rayîrê de kokimêk bivîno, pers bikero, vajo verî şima çi dî çi nêdî, kokimî vanê ke, darî êdî xover benê huşk, ma hende heşîrîye dîye ke, bîme husk, sey kemerî qelaşîyayîme. Vanê, cîrananê ma armenî kerdî teber, ma 38 dî, ma Kore dî, 94î dî.
Leyla Guven, kokima heştay û panc serra qaytê dormê xo kena û ajansê ma rê wina behsê zemanê verênî û dejano xo kena.
‘Ma dewa xo de haştîye de bîme’
Leyla Guven wina dest bi vatena xo kena: “Ma dewa xo de, cîrananê xo de haştîyê de bîme. Pîya delalîye de bîme. Dewe ma jar û dîyarî de bîye. Sultan bava, jara Ana Buyere, Dolu bava, dormê made bîyî. Qirvanî kerdêne, nîyaz vîla kerdêne, çila fîştêneta. Ma pîya werdêne, simitêne, naxirê ma bî, heqay ramîtêne, genîm ramitêne, nûkî ramitêne, gilgil ramitêne, lobîyî ramitêne, ron û torak bî, peynîrî berdêne Mamekîye, her çî zaf bî.”
‘Pêro vesnayî’
Leyla Guven, vana ke eskeran o wext bi zorî waşto înan dewe ra vejo û wina vana: “Eskeran ma ra vat ke şima paştî danê domananê koyî, dewe ra vejîyê, eke şima nêvejîyê na dewe veşnenîme. Tepîya bombayî eştî, ma vazdayê zereyê mixarî, miqare birijîyayêne ma bîne de mendêne, bîyêne lal. Dar û ber kerd têwerte. Naxir, biz, bînê dêsî de, binê kemer de mendî. Pêro vesnayî.
‘38î de cayê banan aseno, 94î jû kemer nêaseno’
Dewe hînî kerde têwerte ke, 38î de cayê banê ma asayêne, 94 ke ame kemer nêasêne, vîleşîya, şîyê. Bomba ke eşte, lingê bizanê ma cîra bîyî. Ma bar kerd şîme, hîrê rojî vesanîye antîme. Heta ke ameyîme çemê Munzurî ju nasê ma ma rê lete nan da, ma xo eşt Dêrsim xo xelesna.”
Mezelê ma dewe de mendî
Guven qiseyanê xo yê peyênan de vana ke, mezelê pî û kalikê înan dewe de mendî, keso ke bimiro dewe nêbîme kes nêzaneno û vana halê ma nîyaro.
