Hemserekê Pêroyî yê OHD’yî Serhat Çakmakî ard ziwan ke qerarê Komîteya Wezîran a Konseya Ewropa binê pawitişanê huqûqî de mend û vat goreyê serranê verênan hetê huqûqû ra hîna peyserşîyayîş o.
Komîteya Wezîran a Konseya Ewropa derheqê şertanê zîndanî yê Rayberê Şarê Kurdî Abdullah Ocalan de reyna veng da Tirkîya ke wa berpirsîyaranê xo yê mîyanneteweyîyî bîyaro ca. La no qerar goreyê serranê verênan huqûqnasan rê zerşiknayîş afirna.
Hemserekê Pêroyî yê Komeleya Huqûqnasan a Semedê Azadîye (OHD) Serhat Çakmak tewirikê komîte hem hetê huqûqî hem zî hetê sîyasîyî ra erjna.
Serhat Çakamakî ard ziwan ke qerar goreyê serranê verênan binan qerarêko peyserşîye yo û nê vatî: “Hela ke merdim nê qerarî erjneno ganî bi qerarê ke par ame girewtene bigîro dest. O qerar de komîte dest kerd bi berz û vatbi Tirkîya ganî mîyanê serrêke de bedilnayîşanê qanûnîyan bikero. Yanî dezgehê bînî nîşan nêdayî, Meclîs nîşan dabi. No qerar hinî her cade bibi rojdem. Emser ameyêne pawitene ke qerarêko dahîna bitesîr bêro girewtene. Ez eşkera vejî ke no qerar binê pawitişanê huqûqîyan de mend. Goreyê mantiqê huqûqî senî ke peyser game bêro eştene. Ma qala qerarêkî kenê ke 11 serrî yo nîno caardene, coka no peyserşîyayîş o.
Ma tim vatenê tewirê komîte û konsey xeylê wexto dengeyanê sîyasîyan ramojneno û no zî cîdîyetê mekanîzmaya huqûqî xeripneno. No qerar zî mojneno ke raşta wina yo. Hetêkî ra qerar goreyê prosesê çareserîye ameyo girewtene. Tirkîya de semedê aştîya zereyî komîsyonêk est o; la no semedê komîte cayo fermî yê hukmkerdişî nîyo. Tîya muhatap dewlet a, ganî semedê mesele dewlete bêro muhatapgirewtene. Muhatabê komîte Komara Tirkîya ya, Komîsyonê Meclîsî nîyo. Nê qerar de yeno vînayene ke wazenê zemanî ra vila bikerî. No semedê konsey kêmayî ya. Dezgehanê Ewropa vera Tirkîya verî qerarê dahîna pêtî dayêne. Qerara vera Ocalanî de gamêka huqûqî ya peykî ameye eştene. No hetê huqûqî ra raşt nîyo, ma rexne kenê.”
