Remzîye Alparslan serê rewşa ziwanê dayîke çarçoveya prosesî de va: “Waştişê ma o yo ke ma komîsyonê parlementoyî dir munaqeşe bikerê û waştişê xo yê semedê ziwanê kurdkî bîyarê ziwan. No pirsgirêk bingehîno ke ganî nika çareser bibo.”
Komeleya Cigêrayîşê Kurdkî dersê kurdkî dana û kultur û ziwanî ser o cigêrayîşan kena. Komela ke ziwanê kurdkî pawena, eynî wextî de wazena ke ziwanê kurdkî bibo ziwanê fermî û ziwanê perwerdeyî. Komela têkoşînê xo hemverê hêrişê ziwan û polîtîkayê asîmîlasyonî ser o dewam kena, eynî wextî de reyna qetî kerd ke lazimîya statuyêk meşrû kurdî rê bêro dayîş. Her kultur, sazgeh û rêxistinê ke ziwanê kurdkî ser o xebityenê, hêrişan dir rî bi rî manenê zî hewldayîşê înan yê semedê qetîkerdişê statuyê ziwanê dayîke, kurdkî, bêmabêne dewam kenê.
Hemsereka Komeleya Cigêrayîşê Kurdkî Remzîye Alparslan, hem hêrişê ziwanî ser û hem zî statuyê ziwanê dayîke de çarçewaya prosesî de jinnewsî rê erjnayîş kerd.
‘Komelê kurdî wazeno qanûn bêro vetiş’
Remzîye Alparslan dîyar kerd polîtîkayê ke hemverê ziwanê kurdkî astengîyan vejenê, bi serran o dewam kenê û va: “Demê peyîn de, keyeyêk ke kuçe de deyîre goşdarî kerdêne, hêrişî dir rî bi rî mend. Bi serran o hêrişê ziwanê komelêk yeno kerdiş. No problem tena bi viraştişê qanûnê newe semedê ziwanê kurdkî eşkenê bêrê çareser kerdiş. No waştişê ma yo û ma do têkoşînê xo yê semedê bidestkerdişê nê dewam bikerê. 100 serrî yo, înan bi polîtîkayê xo yê asîmîlasyon û hêrişê yê ziwanê kurdkî ser o hewl dayê şarê kurdî çin bikerê. Ganî ciwanî hemverê nê zîhniyetî bişuxilîyê. Komela kurdî wazena ke ziwan û kulturê ci bêro tesdîqkerdiş û ê wazenê ke qanûnî semedê nê bêrê vetiş.”
‘Waştişê ma o yo ke ziwanê dayîke kurdkî bo’
Remzîye Alparslan, dewam de wina va, “Bi serran o ma semedê ke tutê kurdî bieşkê bi ziwanê xo perwerde bivînê, têkoşîn kenê. Ganî tutî bi ziwanê xo pîl bibê û geş bibê. Ganî êdî şarê kurd bi ziwanê xo perwerde bivîno û ganî ziwanê kurdî hetê her kesî ra bêro naskerdiş. Ma do na babete de konferans û înîsiyatîfê bînan de bîyarê ziwan. Waştişê ma o yo ke no çî komîsyonê parlementoyî de bêro munaqeşekerdiş û waştişê ma yê semedê ziwanê kurdkî bêrê îfadekerdiş. Ma wazenê ke zextê ziwanê kurdî ser avuryo. Eke na rewşe bivuryo, ma do konferansan organîze bikerê û xo semedê musayîşê perwerdeyê bi ziwanê kurdkî amade bikerê. Ma do kamîya xo ser û gamê ke ma eşkenê bierzê ser o bişuxilîyê. Ma bawer kenê ke no proses do bibo sebebê gamanê şênberî. Xebata ma atolyeyê ke ma semedê ziwanê kurdkî akerdî de dewam kenê.”
Problemêk 100 serre
Remzîye Alparslan, tewr peyîn wina va: “Problemê ziwanê kurdkî, problemêk 100 serre yo. Ma vînenê ke sîyasetêk sîstematîk heta roja ewro dewam kerdo. Ma hêvî kenê ke ziwanê kurdkî bireso sewîyeyêka ke tena kursan de nê, wendegehan de zî bêro mojnayîş. Têkoşînê ma ver bi nê çî yo. Vengdayîşê ma o yo ke ziwanê kurdkî statûyêk bi dest bikero û di sazgehê perwerdeyî de ca bigîro û şarê kurdî bêro naskerdiş. Ganî şarê kurdî hêzê xo bikero yew, pey nê waştişan vindero û semedê bidestkerdişê nê çî hewl bidê. Ma şarê kurdî rê veng danê ke tutanê xo dir kurdkî qisey bikerê. Her cayî de kursê ma est ê. Ganî ê tutanê xo bişirawê kursan û piştrast bikerê ke ê bi ziwanê xo perwerdeyî vînenê. Ganî ê her cayî de ziwanê xo bipawê.”
