Suwêda de ya ke binê hêrişê çeteyanê HTŞ, DAIŞ û SMOyî de ya, şar cenazeyanê xo mîyanê bêvengîye de defin keno. Bi desan cenazeyî bê tesbîtkerdişê nasnameyanê û xeberdayîşê keyeyanê înan yenê definkerdene.
Suwêda de qirkerdişê çeteyanê DAIŞ, HTŞ û Artêşa Sûrîyeya Mîllî (SMO) yê vera durzîyan dewam kenê. Badê qirkerdişan şarê Suwêda cenazayanê xo mîyanê bêvengîye de defin keno. Rîyê rijnayîşê hêrişanê wehşîyan ê çeteyan ra cenazeyî goreyê şertanê weşîye nînê pawetene û definkerdene.
Dîmenanê neweyan de yê ke ameyî destfînayene, bi desan cenazeyî tewreyanê sipîyan de bi hewayêkê komkî waranê akerdeyan de pawenê. Nê cenazeyî goreyê standaranê asayîş û pênaskerdişî nînê definkerdene. Goreyê zanayişanê ke bajarî ra ameyî girewtene, cenazeyî bê tesbîtkerdişê nasnameyanê û xeberdayîşê keyeyanê înan hetê selahîyetdaran û Heyva Sor a Erebe ya Sûrîye ra lezabez yenê definkerdene. Na rewşe bena sebebê zafbîyayîşê şikan.
Goreyê dîmenan û belgeyanê ke merkezanê weşîye yê Suwêda ra ameyî girewtene cenazeyî bê qeydkerdiş û çimdarî yenê definkerdene. Nika definkerdişê cenazeyan ê komkîyan dest pêkerd. Dîmenan de yeno vînayene ke tew tay vist cenazeyî bê sereyî û teberê şertanê weşîye û îlkeyanê hurmetî yê merdeyan yenê definkerdene. Cenazeyê ke ameyî komkerdene definkerdişî pawenê. Goreyê zanayîşanê ke ma bajarî ra girewtî bajar de qet pîsporê weşîye çîn o û nê semedî ra cenazeyî nînê qeydkerdene û analîzê DNA nînê kerdene.
Şahîdêko ke Suwêda de ciwîyeno derheqê definkerdişê cenazayan de nê vatî: “No prosesê definkerdişî yo normal nîyo. No bi zanayîş çînkerdişê nasnameyî yo.”
Nika Heyva Sor a Erebe ya Sûrîye xebata definkerdişê cenazayan rayra bena. Cenazeyî bi konvoyan yenê kiriştene û tay cayan de cenazeyî komkî û bê nasname yenê definkerdene. Nê prosesî de gerek bale bêro serê rolê Heyva Sor a Erebe, çunke derheqê nê operasyonan de eşkerayîya fermî nêameye dayene.
Goreyê zanayîşanê ke me Suwêda ra girewtî hem kuçeyan de cenazeyî estê.Tay cenazeyî komkî yenê definkerdene la hema kuçeyan de cenazeyî estê. Seba ke bajar de têmîyankewtiş esto nêame zelalkerdene ke cenazeyî sivîlî ya nê. Meyîtî yenê parçekerdene, nasnameyê înan yenê çînkerdene û mîyan yenê definkerdene.
