Herêma Sefîneyî ya Koyê Cûdî de xeylê mezelê endamanê PKK’yî est ê. Leşkerê tirkî mezelê rijnayî û mezelan ra tena çend parçeyê mermerî mendê.
Herêma Sefînî ya dewa Gulindor ke kewena zereyê Koyê Cûdî goristanê Lawkê Xerîb û cenazeyê xeylê dewijan û yê xeylê endamanê PKK’yî zî tîya de ameybî definkerdene. Serra 2011î ra pey herêma dewa Spîndarokî seba endamanê PKK’yî Goristanê Cûdî amebi viraştene û xeylê cayanê Koyê Cûdî ra cenazeyê endamê PKK’yî ke dem û cayanê cîyayan de cuya xo vîndî kerda, tede ameybî definkerdene.
Goristanî de tena mezelêk menda
Sey cayanê bînan hûmarêka zafe cenazeyê endamanê PKK’yî goristanê Lawkê Xerîbî ra berdbî Goristanê Cûdî. Serra 2016î de Goristanê Cûdî ame rijnayene. Reyna mezelê endamanê PKK’yî yê ke mendê zî Goristanê Lawkê Xerîb de hetê hêzanê artêşê Tirkîya ra ameyê rijnayene û nika cayê mezelan zî nêyeno zanayene. Goristanî de tena tirba Lawkê Xerîb menda.
Kerreyê mezelan parçe parçe kerdê
Seba ke herindê mezelanê PKK’yîyîjan zî goristan de nêmendê, nêyeno zanayene ke ka çend mezelî ameyê rijnayene. Reyna mezelan ra tena çend parçeyê kerreyê mermerî ke nameyê PKK’yîyîjan ser de nuştebi, mendê. Nê parçeyan ser o tena nameyê Şoreş, tarîxêko 1992 û tarîxêko 1978 û nameyê qezaya Elbîstanî ameyo nuştene, mendo.
