Parlamentera Katalonyayî Eulâlîa Reguant da zanayîş ke ganî komelê mîyanneteweyî tehdîdê DAÎŞ’î û Şorişê Rojawanî newe bîyaro xo vîr û vat: “Îdareyê xoserî reyde paradîgmaya Birêz Ocalanî ke 10 serrî yo yena qiseykerdiş, yewin pêşnîyazê demokratîkbîyayîşê Rojhelatê Mîyanên o.”
Parlamenterê DEM Partî yê Rihayî Omer Ocalan 23ê Teşrîna Verêne de Îmrali de Rayberê PKK’yî Abdullah Ocalan reyde pêvînayîşêk kerd û Abdullah Ocalan dîyar kerdbî ke semedê aştîye her tim amade yê la tecrîd dewam keno. Eynî wextî de Abdullah Ocalanî pêvînayîşî de wina vatbî: “Ma eşkenê na mesela bi diyalogî çareser bikerê. Ma eşkayêne na mesela serra 2000î de zî çareser bikerdêne. 1999 de zî mi vat, ez eşkena çareserî rê xizmet bikera. Nika zî vana. Înan vatêne ‘Apo, semedo ke xo bixelesno nê keno.’ La ma hema zî a noqta de yê û hema zî babeta ke parlamento de yena qiseykerdiş na ya. Serre 2024 a, hema zî pêrodayîş, hema zî bêçareserîye est o.”
Badê nê pêvînayîşî, heyetêk mîyanneteweyî semedê pêvînayîşê Abdullah Ocalanî reyde 3ê Kanûne de ame Enqera. Parlamentera Katalonyayî Eulâlîa Reguant zî heyet de bî û çimdarîyê xo yê nê serdayîş de ard ziwan.
Tirkîya semedê wedaritişê tecrîdî game nêeşta
Parlamentera Katalonyayê Eulâlîa Reguant wina vat: “Semedê serdayîşê Birêz Ocalanî û şikinayîşê tecrîdî, ma ameyê Tirkîya. Tirkîya pêşnîyazanê semedê heqê tepişteyan ca nêana. Xeylê sazgehê mîyanneteweyî yê ke vanê ganî tecrîd bişikîyo, est ê. Ma Stenbol de bîyî. Ma avûkatanê Ocalanî reyde pêvînayîşêk kerd. Ma rêxistinê heqî reyde pêvînayîşêk kerd. La çîyo ke ma dî, Tirkîya metodê huqûqî yê mîyanneteweyî ca nêana.”
Keso ke no şer vindarno Ocalan o
Eulâlîa Reguant dewam kerd û wina vat: “Birêz Ocalan mifteyê çarserîye yo û yewin keso ke nê pêrodayîşî werte ra wedarno o yo. Abdullah Ocalan bi fikrê çareserîya demokratîke, eşkeno bibo mifteyê çareserîya şerê Rojhelatê Mîyanên. Wexto ke pêrodayîşê Sûrîye dest pêkerdî ma Enqera de bîyî. Çîyo ke ma endamê delegasyonî fikrîyenê, şikinayîşê tecrîdî yo. Semedê azadbîyayîşê Ocalanî eynî wextî de çareserîya pêrodayîşî herême ya.”
Semedê Rojawanî bi feyde o
Eulâlîa Reguant vat ke, ganî bi lez tecrîd wirzo û vat: “Îdareyê xoserî reyde paradîgmaya Ocalanî ke 10 serrî yo yena qiseykerdiş, yewin pêşnîyazîyê demokratîkbîyayîşê Rojhelatê Mîyanên a. Coka ganî her kes goş bido vatişanê Ocalanî û tecrîd bişikino. Yewin rayîr no yo. No seba awankerdişê Sûrîyeya newe eşkeno bibo paradîgma. Nê semedî ra ganî her kes waştişê şikitişê tecrîdî bikero.”
‘Ma bi vengêko berz paradîgma qal bikerê’
Eulâlîa Reguant tewr peyên wina vat: “Ganî ma sewîyeya mîyanneteweyî de vengê Kurdan berz bikerê. Ganî ma paradîgmaya Ocalanî qal bikerê. Ganî ma nika semedê şikinayîşê tecrîdî vengê xo berz bikerê. Ganî komelê mîyanneteweyî tehdîdê DAIŞî û Şorişê Rojawanî newe ra bîyarê xo vîr. Pawitişê babeta Kurdî muhîm a.”
