Dewa Şêxê Reş û Dewa Zûrûn riyê vetişê petrolê Koyê Gabarî ra bêawe mendê.
Kurdîstan de roje çin a ke xoza ser o qetlîamêk nêro kerdene. Bi taybetî zî no qetlîam daristan û koyanê Kurdîstanî de yeno kerdene. Talanê xoza tesîrêko negatîf cuya gandaran ser o keno. Herêma Koyê Gabarî zî bi birnayîşê daran û vetişê petrolî para xo talankerdişê xoza ra gêno.
Dewa Şêxê Reş û dewa aye Zûrûn zî riyê bîranê petrolî ke hetê TPAO’yî ra petrol yeno vetene, bêawe mendê. Çend rojan ra ver Serekîya Resnayîşî ya girêdayeyê Serekkomarîya Tirkîya eşkerayîyêk dabî û dîyar kerdbi ke kêmbîyayîşê awa dewanê derûdorê Koyê Gabarî riyê petrolî ra nîyo. La vatişê dewijan û yê Serekîya Resnayîşî yewbînan nêgênê.
‘TPAO’yî ra pey awa hênîyanê ma lêl bîye’
Welatijo bi nameyê Suleyman Akdemîr vat ke hênîyê dewa înan bi seyan serrî yo herikîyeno la emserr awa ey ver bi qedîyayîşî şîya û nê çîyî vatî: “Nameyê hênîyê ma Hênîyê Şêx Dawut o. Bi seyan serrî yo dewe nê hênî ra awa xo peyda keno. TPAO’yî ra pey ke ame Koyê Gabarî, hênîyo ke ma tira awe girewtêne, awa ey lêl bîye. Dima boya mazotî awe ra ame, êdî ma nêeşkeayî awa hênîyê xo bişimê.”
‘Ma nêeşkenê sereyê gedeyanê xo bişuyê’
Cinîya bi nameyê Elîf Akdemîr vat mesele awa şimitîşî tena nîya û wina dewam kerd: “Nika awa şimitişî ma rê anê la mesele tena awa şimitişî nîya. Ma nêeşkenê sereyê gedeyanê xo bişuyê û nika boye kewta keyeyê mi. Çend rojan ra ver warzayê mi ameyê keyeyê mi la seba ke awa ma kêm bîye, ma nêşina mêmananê xo rê xizmet bikê. Dewa ma nêzdîyê 700 keye yo û emserr dima ke dest bi xebatanê petrolî kerd, dewe bêawe mende.”
‘Awa tankere anê, xeylê reyan pak nîya’
Meryem Erîk zî da zanayene ke keyeyê aye de 2 astengdarî est ê û wina qisey kerd: “Maya mi û kênaya mi astengdar ê. Awe bi tankeran ma rê anê. Awa ke anê zî xeylê reyan pak nîya. Bi a awa lêmine ma keyeyê xo şuwenê. Xeylê reyan awe çin a ke ma bidê heywananê xo zî.”
Berfê Bîrlîk ke 70 serrî ya dîyar kerd ke emrê aye de çîyêko winasîn nêameyo serêyê aye û wina dewam kerd: “Emrê mi bîyo 70, mi çîyêko winasîn nêdîyo. Dima ke nê sondajê petrolî kenayê, awa ma lêl bîye û boya mazotî tira ameye.”
Darê ma pêro huşk bîyê
Bîrlîk tewr peyên îfade kerd ke înan emserr çîyêk nêramito û qiseykerdişê xo wina qedêna: “Her serre ma citkarî kerdêne. Nê wextan de ma sewzîyê xo werdêne û ma rotêne. Emserr ma çîyêk nêramit û ma gelekî perîşan bîyê. Hayo şima vînenê, darê ma yê henar û încîrî huşk bîyê. Her serre mi seba zimistanî încîrî huşk kerdêne, mêmanêk biameyêne ma meywe dayêne, emserr pêro huşk bîyê.”
