Endamê Konseya Rayberdişî ya KCK’yî Mustafa Karasuyî ard ziwan ke şertê tecrîdê serê Rayberê Şarê Kurdî Abdullah Ocalan verê averşîyayîşê prosesî asteng kenê û vat dewlete zî tede gerek her kes wezîfeyê xo bîyaro ca.
Endamê Konseya Rayberdişî ya KCK’yî Mustafa Karasuyî programê taybetî yê Medya Haber TV’yî de rojdem erjna. Qiseykerdişê Karasuyî ra qismêk wina yo:
”Rewşêka tengkewişê prosesî est a. No xora bi tewirê îqtîdarî ame afirnayene. Qetî rîyê ma ra nîyo. Karekterêkê nê prosesî est o. Çîyê ke gerek bêrê kerdene est ê. Çew nêeşkeno vajo qet çîyêk nêkeno ya zî her çî sey verî beno. Eke qala çareserkerdişê wina problemê girdî yena kerdene o wext gerek bedilnayîş bibo, gerek vatişêko bîn bibo. Seba ke dewlete game nêerzeno komel û dostî qesawet kenê. Bi qesawetî têgêrayîş têkoşînî astengneno, kede asteng keno. Gerek ma bi heyecanî tewrê nê prosesî bibê, gerek ma rêxistine bikerê, têkoşînê aktîfî rayra berê. Gerek ma serê dewlete û hukmatî de zextê komelkî biafirnê. Ziwanê demokrasîyî çalakî ya. Demokratî nê pawenê. Demokratî rêxistene kenê, têgêrenê, wazenê û cehd kenê ke bibedilnê; cehd kenê ke qanûna bibedilnê. Gerek her kes dormeyê Vengdayîşê Komelê demokratîkî de bêro têhet.
Tecrîdê serê Rayber Apoyî hema dewam keno. Sey verî nîyo, tay pêvînayîşî bîyî la no qîm nêkeno. Seba ke 26 serrî yo tecrîdî est û nika tay pêvînayîşî benê nê sey normalbîyayîşî ramojnenê. Çîyo winayên çîn o. Hema zî keye û avûkatî hema zî nêeşkenê şirê Imraliyî. Ewro tay pêvînayîşî bibê zî tecrîd dewam keno. Hetê bînî ra Rayber Apoyî cewab de vengdayîşê Devlet Bahçelîyî û înîsîyatîfo gird vet meydan. Eke raşta haştîye yena waştene o wext gerek verê Rayber Apoyî bêro akerdene. Meseleya kurdan ameyoxê Tirkîya zî eleqedar kena. Rayber Apoyî cewab da vengdayîşê Bahçelîyî la dewlete hema sozê xo yê heqê hêvî yanî wedaritişê tecrîdî nêard ca û Rayber Apo hema zî aktîf mîyanê prosesî de nîyo. Coka proses hende aver nêşino. Eke meseleya kurdan meseleya cîddîya o wext gerek bi hewayêkê cîddîyî bêro destgirewtene.”
