Amed de serkêşîya Platformê Dezgehanê Demokratîkan de Amed ra ver bi Anqara Rayraşîyayîşê Azadîye û Çareserîya Demokratîke do bêro kerdene.
Çarçewa Hemleya ‘Abdullah Ocalanî rê Azadîye, Meseleya Kurdan rê Çareserîye’ Amed ra heta Anqara û heman wextî de Îstanbul ra heta Anqara Rayraşîyayîşê Azadîye û Çareserîya Demokratîke’ do bêro kerdene.
Rayraşîyayîş serkêşîya Platformê Dezgehanê Demokratîkan de Amedî de do bêro kerdene. Platformî derheqê rayraşîyayîş de eşkerayîyêke daye. Hemserekê DBP’yî Keskîn Bayindir, Hemserekê MED TUHAD FED’î Pinar Sakik Tekîn û Kerem Canpolat zî tewrê eşkerayîye bîyî.
Metnê deklarasyonî Hemserekê DBP’yî Keskin Bayindirî wend. Metni de dîya zanayene ke Kurdîstan prosesêkê tarîxî ra derbaz beno û Şerê Dinya yo Hîrêyîn cografyaya Rojhelatê Mîyanênî rê zor dano. Metnî de ame parekerdene ke polîtîkayanê şerî ra meseleya kurdan zî çareser nêbena la estbîyayîşê kurdan tim yeno înkardene.
Şexsê Rojawanî de çareserîye û haştîye yenê hedefkerdene
Keskînî îfade kerd ke çaresernêkerdişê meseleya kurdan beno sebebê rijîyayîşê dewletan û vat: ”Birêz Ocalan seba çareserîye muxatabo verên o. Şarê kurdî ey sey îradeyê xo qebul keno. Hema zî tecrîd dewam keno. Ewro Rojawan de zî hêrişê giranî est ê. Şexsê Rojawanî de çareserîye û haştîye yenê hedefkerdene. Seba aştî û aramîye ganî cade berê Îmraliyî bêrê akerdene.
Seba ney ma 16ê kanûne de dest pê Rayraşîyayîşê Azadîye û Çareserîya Demokratîke kenê. Ma do Amedî ra ver bi Anqara şorê. Amedî ra dima Riha, Dîlok, Edene û Mêrsîn de zî rayraşîyayîşî do dewam bikerê. 20ê kanûne de ma Anqara de kom bibê.
Ma venga her kesî danê ke tewrê nê rayraşîyayîşê rûmetî bibo.”
