Berîvan Şahîna ke morekî viraştêne, atolye awan kerd û vera pêro zehmetîyan têkoşînê xo dewam kerd. Berîvan Şahîne wina va: “Yê ke karê ma qij dîyêne estbî, yarî kerdêne estbî. Yê ke pîroz kerdêne zî estbî.”
Berîvan Şahîna ke emrê qijî de morekan dir eleqedar bena, atolyeya morekan awan kerd û bi sermayeyêk 500 TL dest pê kerda. Ewro mêrdeyê xo dir nê karî kena û pêwa krîzê ekonomî hewldayîşê xo dewam kena. Çîyo tewr bale anceno, qutîyê kahweyî ra qutiyê morekan viraşta, qutiyê çaye ra zî qutiyê tewir bi tewir viraşta.
Berîvan Şahîn dîyar kerd ke bi 12 cuzdan, 12 defter, 12 çenteyî dest bi nê karî kerda. Berîvan Şahîne wina va: “14 serrî nayera ver wexto ke ez tute bîya, semedê mi bazinêke viraşte ame dîyarkerdiş. Mi xeylêk ci ra hes kerdêne. Morîyan ra amebi viraştiş. Bazinêke taybetî bî. Mi nê karî ra hes kerdêne. Demê amedekarîyê unîversîta de dukanêk zucacîye de şuxilyayîne. Morî û la ameyîne rotiş. Mi hacetê uca ra çî viraştêne. Min beşê xişirî wend. Ez Mîdyad de bîya. Ma bi hunerê têlkarî dest pêkerdêne.”
‘Ma waşt ma berardeyê xo biroşê’
Berîvan Şahîne dîyar kerd, dimayê dibistane dukanêk morekan de şuxilyaya û va: “Ma waşt ma atolyeya zerdgerî abikerê la şîyayeyê ci zêde bî. Ma anêkerd. Ma waşt ma berardeyê xo biroşê. Mi bi mêrdeyê xo ke o wext hevalê mi bî, 12ê adare 2018ine de dikan akerd. Yê ke karê ma qij dîyêne estbî, yarîye kerdêne estbî. Yê ke pîroz kerdêne zî estbî. Keyeyê mi paştdayîş da mi. Her tim paştdayîşê înan estbî.”
Berîvan Şahîn bale ant serê krîzê ekonomî û dîyar kerd ke tesîrêko gird înan ser o beno û wina qedêna: “Krîz ma dano zorî. Ma êdî hewtane nê, bi serre lazimîyê xo gênê, hacetan gênê. Ma bi 500 TL dest bi nê karî kerd. Nika atolyeyêke ma ya berardişî û cayêk ma yê rotişî est o. La krîz tesîrêk pîl ma ser o keno.”
