Cengîz Çandarî vat ke şansê kurdan est o ke Tirkîya û herême de statuyê dahîna bitesîrî bifînê dest.
Wekîlê DEM Partî Cengîz Çandaro ke derheqê Rojhelatê Mîyanênî de pîspor o û pêvînayîşanê wextanê adirbirnayîşanê bînan ê mabênê PKK û Dewleta Tirke de ca girewt, derheqê eşkerayîya PKK’yî de ANF’yî rê qisey kerd.
Çandarî eşkerayîya PKK’yî sey tarîxîye pênas kerd û nê vatî: “Qerarê ke Kongreya 12. ya PKK’yî de ameyî girewtene, bi înan dewrêkê neweyî dest pê kerd. No têna xo ser averşîyayîşêk o ke heyecan dano. Şarê kurdî sehneyê tarîxî de cayê xo girewt û seba ke heqanê xo bifîno dest hinî têkoşîno çekdan hewce nêkeno. Raya verên a ke serewedaritişêkê kurdan hetê înan ra yeno qedînayene. No pêvajo gerek sey çareserkerdiş meseleya kurdan ney, sey destpêkerdişê cehdekerdişê çareserîye bêro erjnayene. Prosesê çareserîye ewro ra tepîya warê haştîye de, do sey leteyêkê têkoşînê Tirkîyaya demokratîke bêro rayraberdene û na merhaleyêka newî ya.”
Çandarî wina dewam kerd. “Pêvajoya Îmraliyî sereyê ci ra hetê Serekê MÎT’î Îbrahîm Kalinî ra ame rayraberdene. Vatişê AKP vera pêvajo yo xelet o. Kalin bi zanayîşê Erdoganî pêvînayîşê Îmraliyî kerdî. Ûca bazarîye çînbî, di hetan zî semedê çareserkerdişê mesleya kurdan game eşt ê. Erdoganî xo biney peyde ant û Bahçelî vejîya vernî, nê zî verê averşîyayîşê pêvajo akerd.
Tay hetî îtîfaqê kurdan-tirkan yo ke do Tirkîya hêzdar bikero, nêwazenê. Coka rîskê sabotekerdişî est o. Nê tewr zelal Abdullah Ocalan vîneno. PKK nêm seserre yo ke semedê kurdan merkezo tewr giran o. DEM Partî serê zemînê ci de têgêrena. Bi rolê neweyî yê Abdullah Ocalanî DEM Partî do zemînê demokratîkî sîvîlî de nasnameyê neweyî bîfîno dest. Senî, çiwext beno ma nêzanê la warê sîyasetê kurdan do dahîna rengîn bo. Şansê kurdan est o ke Tirkîya û herême de statuyê dahîna bitesîrî bifînê dest.”
