Endamê Îdareyê OHD’yî yê Amedî Mehmet Sonmez îfade kerd ke PKK û Abdullah Ocalan gamê tarîxî eştî û nika zî dewrê dewlete yo ke game bierzo û va ke seba îdarekerdişê pêvajoye ganî TMK bibedilyo.
Partiya Karkerên Kurdistanî (PKK) dima Vengdayîşê “Aştî û Komelê Demokratîkî” yo ke Rayverê Şarê Kurdî Abdullah Ocalanî 27ê Sibate de kerd, PKK 1ê Adare de adirbest îlan kerd. Her çiqas PKK’yî adirbest îlan kerdbî û tewr peyên xo fesih kerdbî zî reyna hêrişê Tirkîya bê mabên dewam kenê. PKK’yî 12ê Gulane de eşkera kerd ke înan peynî dayo heme xebatanê xo.
Endamê Îdareyê Komeleya Huqûqnasê Seba Azadiye (OHD) ya Şaxê Amedî Mehmet Sonmez derheqê pêvajoye de qisey kerd û diyar kerd ke gereke bedilnayîşê qanûnî qanûnî bêrê kerdiş.
‘PKK’yî her çi kerd, nika ganî dewlete game bierza’
Mehmet Sonmez dîyar kerd ke qerarê PKK’yî tarîxî yo û wina qisey kerd: “Qerarê PKK’yî nîno manayî ke bi şert û mercan xo fesih kerd. Ev 50 serrî yo PKK şerê çekdarî keno. Wayîrê xo aseno ke êdî bi rayîrê sîyasetê demokratîkî û dîplomasîyî do xebatanê xo dewam bikero. Seba qerarê PKK’yî hem seba kurdan hem zî seba Rojhelatê Mîyanênî zaf avzel o. Komel vano ke yew dem qefilîyo, demê dîplomasîyî û sîyasetê demokratîkî dest pêkerdo. Seba nê qerarî lazim o ke dewlete zî çi keweno milê xo bikero. PKK’yî qerar girewt û her çi kerd, dima nê ganî dewlete game bierza.”
‘Ganî waştişê şarî bêrê qebulkerdiş’
Mehmet Sonmez eşkera kerd ke ganî şar wazeno xo her ca de bivîno û nê vatî: “Şar verî heme ganî wayîrê nasnameyê xo bo. Şar waştişê estbîyayîş, ziwan û cayê ke nameyê înan bedilyayo keno. Bi nê hawayî şar eşkeno tewrê pêvajoye bo. Sazgehê ma yê huqûqî ser qanûnê bingeyînî yo ke newe bêro awankerdene eşkenê pêşnîyazanê xo amade bikerê. Sazgehê ma lazimo vera polîtîkayanê ke seba şarî nîyê, wardê û xebate bikerê.”
‘Şar paweno azadîya Birêz Abdullah Ocalanî’
Mehmet Sonmez da zanayiş ke waştişê şarî ganî nîro taloqkerdene û qiseykerdişê xo wina domna: “Şar wazeno ke heqê hêvîye bîyaro ca. Şar tena wedartişê tecrîdî nêwazeno. Ewro şar paweno azadîya birêz Abdullah Ocalanî. Ewro tecrîd heme hepisxanayan de dewam keno. Dewlete hema zî tu game nêeşta, gereke lezûbez game bêrê eştene. Şar ser waştişê perwerdeyê kurdkî zî vindereno. Miyanê waştişanê serekîyan de no est o. La nê waştiş tenya dersê weçînitî nîyo. Seba ci gereke ziwanê kurdkî bibo ziwano fermî. Ewro yew game de tarîxî ameyo eştene gereke dewlete zî gamê muhîmî bierza. Ganî nê waştişê şarî nîrî peygoştkerdişî.”
‘TMK nêro vurnayene tu pirsgirêk zî çareser nêbenê’
Mehmet Sonmez vîr ard ke dima qerarê PKK’yî zaf çî ganî bêrê bedilnayîşî û wina qise kerd: “Dima nê qerarê tarîxî, zaf kar û bar keweno milê sazgehan. Ma zî zey OHD’î amade yê ke amadekerdişê qanûnê bingehînî yê neweyî de ca bigîrê. Ma zî seba nê yewîye xebate ramenê. Babeta înfazî zî zaf avzel a. Hema zî nêameya çareserkerdene. Kesê ke cezaya muebbedî ci rê ameyo birnayene û cezayê xo yê 30 serrî qedênayo, nîno veradayene. Ganî na yew werteyî ra bêro wedartene ya zî newekerdiş. Kesê ke cezaya muebbedê giranî ci rê ameyo birnayene qanûn de vano; do heta peynîya emrê xo hepisxane de bimanê. No çî qet cayanê dinya de çin o û nîno qebulkerdene. Lazim o ke no qanûn bêro wedartene. Zaf persgirêk mîyanê qanûnê TMK’yî de est ê. Seba nê pirsgirêkan bêrê çareserkerdene gereke no qanûn bêro wedartene. TMK nêro bedilnayîş tu persgirêk nîno çareserkerdiş.”
