Endamê Komîteya Rayberdişî yê PKK’yî Murat Karayilanî vat seba ke qerarê qedîyayîşê têkoşînê çekdarî bikewê dewre gerek dewleta tirke cade bedilnayîşanê qanûnîyan bikera.
PKK’yî kongraya xo ya 12. mabênê tarîxanê 5-7ê gulane de Herêmanê Pawitişî yê Medya de kerd. Kongre encamnameyê xo û qerarê ke girewtî rayrapêroyîye de pare kerdî.
Hêzanê HPG û YJA Starî zî bi hewayêkê hemwextî waranê xo de kombîyayîşî kerdî. Endamê Komîteya Rayberdişî yê PKK’yî Murat Karayilanî ke qiseykerdişê akerdişê kongre kerd, vat peynîkerdişê têkoşînê çekdarî peynî nê, destpêkerdişêk o.
Karayilanî ard ziwan ke mîyanê dewleta tirke de hetêk esto ke wazeno şer dewam bikero û vat: “Xora ma dî ke aqilo ke vano ‘ma înan do bi çeke biqedînê’ çare nêbeno. Rayber Apo 90yan ra nata seba ke meseleya kurdan bi rayîrê sîyasîyî çareser bikero kede dano.1993 de adirbirnayîş îlan kerd la dewleta xorî mudaxale kerd. Turgut Ozal, Eşref Bitlis û heme ekîb nê semedî ra ame tesfîyekerdene. Rayber Apoyî hema o wext waşt ke bedilnayîş bikero.”
Erjnayîşê Karayilanî yê kongre ra qismêk wina yo: “Devlet Bahçeliyî bi nameyê dewlete veng da. Vat ‘Tirkîya binê tehlukeyî de semedê gerêk ma haştîya zereyê welatî bîyarê ca.’ Vengdayîşê Rayber Apoyî yê 27ê sibate tarîxî yo. No vengdayîşê averberdişê têkoşînê dewrê neweyî yo. Ez zana zaf embazî bi hewayêkê hîssî nizdî benê. Ma verî zî mesele wina girewtêne dest. La wext şi û Rayber Apo vatişanê xo de heqdar vejîya. Rayber Apo vîneno ke çîyê ke qewimîyenê sînoran ra vejîyenê teber. No vengdayîş semedê heme merdimîye muhîm o. Hinî Kurdîstan sînoranê xo ra vejîyeno. Gerek ma prangayanê xo ke têna Kurdîstan de veng vejenê hinî bierzê. Rayber Apo ma ra nê wazeno. Ma feskerdişê PKKyî wina fam bikerê.
Senî ke Rayberîye zî vano eslê xo de rolê PKKyî serranê 1990 de qedîya. Seba ke qerarê ronayîşê çekan bêro caardene gerek bedilnayîşê qanûnî bibê. Senî ke notî de ame nuştene ke şehîdê erjîyayeyî Sirri Surayya Onderî bi destê xo nuşt û kombîyayîşê tarîxî yê 27ê sibate de wend, gerek heqê huqûqî û sîyasetê demokratîkî bêrê caardene. Eke haştîye zereyî wazenê wa verî dimenîye biqedînê. Hema zî hêrişî est ê. Rixmê adirbirnayîşî hêriş kenê û çekanê qedexeyan şuxulnenê. Coka gerek gamanê huqûqî û fermî bierzo. Eke bedilnayîşê huqûqî bibê no têgêrayîş çeke nano ro. Nêbo zaf zor o.”
