Qerarê PKK’yî derheqê qedênayîşî xebatanê xo de, çapemenîya dinya de gulbang da.
PKK’yî beyanatê Kongreya xo ya 12. ke “Vengdayîşê Aştî û Komelo Demokratîkî” yê Rayberê Şarê Kurdî Abdullah Ocalanî ra pey ronaye, eşkera kerde. Beyanatî de ame vatene ke Kongreya 12. 5-7ê Gulane de ameye kerdene û wina ame vatene: “Nê bingeyî ser o Kongreya PKK’yî ya 12. Seba prosesê pratîkbîyayîşî hetê Rayber Apoyî ra bêro rayraberdene, qerarê fesihkedişî rêxistina PKK’yî û qedênayîşê rêbazê têkoşînê çekdarî qirewto û xebatî ke nameyê PKK’yî ser o rayra berdê, qedênayî.”
Qerarê PKK’yî çapemenîya pêroyê dinya de gulbang da. Weşanê sey Reuters, The New York Times, ABC News, Le Monde, The Washington Post, Al Jazeera û ûsn. Sey xebera lezgîne wendoxanê xo reyde pare kerd.
Rojevê dinya de yo
Xebera Reutersî ya bi sernameyê “PKK vila beno û serewedaritişî Tirkîya qedêneno” ame vatene ke qerarê PKK’yî sere de Iraq û Sûrîye do seba herêmêka hîna hîra xo reyde encamanê sîyasî bîyaro.
The New Yor Times zî qerarî bi sernameyê “PKK şerê hukmatê tirk reyde qedêneno” dîyar kerd. Xebere de ame dîyarkerdene ke qerarê PKK’yî do welatanê cîranan de gulbang bido.
ABC News’î beyanatê kongreyî bi hewayêko hîra da û bale ant vatişê “Kongreya PKK’yî ya 12. ya Awarte erjna ke têkoşînê PKK’yî sîyasetê înkar û îmhayî yo ke şarê ma ser o yo parçe kerd, meseleyê kurdî bi rayîrê sîyaseto demokratîk ard nuqteya çareserî, nê hetan ra PKK’yî mîsyonê xo yê tarîxî temam kerdo.”
Rojnameyê rojane yê Fransayî Le Monde zî sernameyê “PKK ya bi desan serran o hukmatê tirk reyde şer keno fesihkedişê xo eşkera kerd” weşana. Xebere de ame vatene ke qerar vengdayîşê Rayberê Şarê Kurdî Abdullah Ocalanî yê 27ê sibate ra pey ameyo girewtene.
The Washington Postî zî ca da qerarê kongreyî û vat ke hewldayîşêko newe yê aştî yo.
Keyepelê resmî yê TF1’yî de ke televîzyon û kanalo taybet ê ewilin ê Fransayî yo zî wina ame vatene: “PKK’yî eşkera kerd ke xo fesih kerdo û têkoşînê çekdarî qedênayo.”
Xebera France 24î de zî ame dîyarkerdene ke PKK yo ke 40 serran ra vêşêr o vera Tirkîya şer keno, qerarê xofesihkerişî dayo.
Deutsche Welle’yî zî xebera xo de îfade kerd ke qerarê PKK’yî vengdayîşê Abdullah Ocalanî ra pey ameyo girewtene.
Rojnameyê Lavanguardia yê Katalonyayî zî qerarê kongreyî bi sernameyê “Rêxistina kurde PKK’yî 40 serran ra pey xo fesih kerd û eşkera kerd ke çekî ronayê.” dîyar kerd.
Rojnameyê El-Mundoyî yê Spanyayî zî sey xebera lezgîne û bi sernameyê “PKK Tirkîya reyde adirbest îlan kerd la şertê çekronayîşî girêdayeyê veradîyayîşê Ocalanî kerd.” dîyar kerd
Al Jazeerayî zî xebera xo ya bi sernameyê “PKK vila beno, şero ke bi desan serrî yo Tirkîya de dewam keno, qedêyeno” de bale ant vatişê “Êdî PKK’yî mîsyonê xo temam kerdo.” ser o.
