Tengijîyayîşê mabênê Hîndîstan û Pakîstanî de bedilîya, bi lej. Hêrişanê her di hetan de 3 teyareyî ameyê fînayene û bi desan kesî ameyê kiştene.
Artêşê Hîndîstanî dîyar kerd ke Pakîstanî adirbest binpay kerdo û top eştê herêmanê Bhîmber Galî û Poonch-Rajaurî yê Keşmîrî. Ame dîyarkerdene ke bi rengêko “musaît û bi pîvan” cewabê hêrişan ameyo dayene.
Demê şerî de tewr kêm 3 teyareyê şerî yê aîdê Hêzanê Hewayî yê Hîndîstanî kewtê. Çimeyanê ewlekarî dîyar kerd ke enkazê di teyareyan Keşmîr de ya ke binê kontrolê Hîndîstanî de ya, uca de yo, o bîn zî eyaletê Pencapî de yo. Derheqê rewşa pîlotan de hema tu eşkerayî nêameyê dayene.
Hêrişê bombayî yô ke 22ê nîsane de herêma Keşmîr a Hîndîstanî de ame kerdene, ey ra dima mabênê di welatan de tengijîyayîş vêşî bi. Hîndîstanî zî bi fuzeyan hêrişê “binesazgehanê terorîst” yê ke erdê Pakîstanî ser o yê, kerd. Artêşê Pakîstanî zî cewab da hêrişan.
Verfekê Artêşa Pakîstanî Korgeneral Ahmed Chaudhry dîyar kerd ke hêrişê hewayî yê Hîndîstanî yê nuqteyanê cîyayan ser o tewr kêm 26 sîvîlan cuya xo vîndî kerda û 46 kesî zî birîndar bîyê.
Ame dîyarkerdene ke vîndîkerdişo tewr pîl camîyêko şaristanê Bahawalpur ê eyaletê Pencapî de qewimîyayo ke hêrişî de îna ra yew gede, bi pêroyî 13 sîvîlan cuya xo vîndî kerda.
