DEM Partî û ÎHD’î serrgêra Qirkerdişê Armenîyan ser o beyanatê nuşteyî dayê. ÎHD’î beyanatê xo dîyar kerd ke sûcêk nêro cezakerdiş do verdewam biko. DEM Partî zî beyanatê xo de aşkera kerd ke ê wazenî ke wa heme raştîyan bivejo werte. Baroya Amedî zî va ke rî bi rî bêrê.
Serrgêra Qirkerdişê Ermenîyan ser o DEM Partî û ÎHD’î beyanatê nuşteyî dayê.
Beyanatê ÎHD’î wina yo:
Înkar, qirkerdiş domdar keno. Înkar bêsûckerdişê kiştoxî yo û sûcdarkerdişê qurbanî yo. Seba ke Qirkerdişê Armenîyan yeno înkarkerdiş û kiştoxî zî nêameyî cezakerdiş, no ser zî politikaya înkarî dewam keno. Înkarkerdişê qirkerdişî ra nata Tirkîya de herikyayîşê gonî, hesrê çimanî û qirayîşî nêvindert. Çimkî ‘Adalet Cayê Xo Nêdî’ çi heyfo ke qurbanê qirkerdişî hema zî azap ancenî.
Bi vatişê ‘Ma nêkerd’ qirkerdiş înkar nêbeno. Tornê qurbanê qirkerdişî her roj qirkerdiş newe ra cuyenî. No zî kiştoxan, qehramankerdişî yo û rûmetkerdişê qirkeran o. Demê peynî de pesnê mîmarê qirkerdişî Enver, Talat û Cemal Paşayan û îtîhatgeran yeno kerdiş. Armenîyê Tirkîya nêçare, înkarkerdişî her warê cuya xo de cuyenî, Armenîyê dinya zî herrayê xo ra dûr ê.
Ma ewro, Sevag Şahîn Baliçiyo ke 24ê Nîsana 2011î, Êlih de ame qetilkerdiş yad kenî. Ma her serra Qirkerdişê Armenîyan de vanî ke înkarkerdişê qirkerdişî, verdewamîya qirkerdişî ya. Fek înkarî ra veradê, bi netîceyê huquqî sûcê qirkerdişî qebul bikerî. Encax no dem adalet do cayê xo bivîno. Eke wina dewam biko do Tirkîya qet rojê weş nêvînena. BIŞINASNE, EFÛ BIWAZE Û TAZMÎN BIKE!”
Zerrîya ma de domyena
Beyanatê DEM Partî zî wina yo:
“24ê Nîsana 1925î de 235 roşnvîr, hunermend, muzîsyen û wekîlanê şarê armenî, bi zorî keyeyanê xo ra ameyî destbendkerdiş, peynî zî bi sehezaran ermenî ameyî koçkerdiş û ameyî qetilkerdiş. No qirkerdişî ser o zî 110 serrî vîyart. Partîya Îttîhat û Terakkî bi zîhnîyetê yewperestî no qirkerdiş îcra kerd û no qirkerdiş bi deserran ke zerrîya ma de dejêka gird verada û na dej zerrîya ma de hema zî domyena.
Tarîxî ra nika nêwaştî, trajeyîya merdimeyî reyde rî bi rî bêrê, hetta ferasetê îttîhatkaran ra wayîr vejyayê û xela dayê înan rê. Na politikaya înkar û qirker na seserra ke domyena, nasname û bawerîyan ser o ame tatbîkkerdiş. Kurd, suryanî, rum, elewî û sewbî şaranê kêmanî marûzê sîyasetê qirkerdişî mendî.
Cografya ma de zafbawerî û zafrengînî sey mîras qebul nêkerdî, çi heyfo ke sey gefêk girewtî verçiman. No zî polîtîkayanê xo yê înkar û îmhayî ra zemînêk kerdî, netîceyê na polîtîka de zî surgunkerdiş, asîmîlasyon û qirkerdişî pê ameyî. Dewletê netewî, nasname, bawerî, mezhebê şaran xo rê sey heqeretêk û telûke esas gênî. Ganî ma ewro heqîqetîya zafrengînî û zafbawerî ser o qise bikerî û wayîr bivejî.
Na heqîqet, înşakerdişê ameyoxê demokratîk, azad û seypêyî de xercêko binkey o. Dewleta netewî, wazena zîhîyetêko yewperest awan bika, no ser zî ma vanî ke no qirkerdiş reyde rî bi rî bêrê.
Na çarçiwe de 24ê Nîsana 1915î de serrgêra Qirkerdişê armenîyan de, ma wazenî ke heme raştîyan bivejo werte û no ser zî şerto ke no qirkerdiş reyde rî bi bêrê. Seba no zî têkoşînê ma do her tim bidomyo. Ma deja şarê armenî pare kenî, ma nêwazenî dejanê winayin hewna bêrê cuyayîş û ma veng danî her kesî ra bêrê verpirsîyarî bigê.”
Baroya Amedî: Qirkerdişî tena vîra armanîyan de nê, vîra komelî de zî birînêka xorîn akerda
Baroya Amedî zî serrgêra Qirkerdişê Armenîyan ser o hesabê xo yê X’î de mesajêk pare kerd. Mesaj de ame dîyar kerdiş ke qirkerdiş tena vîra armanîyan de nê, vîra komelî de zî birînêka xorîn akerda û wina domyeno: “Armenîyan parçeyêka na herra yê, armanenîyan binê kontrolî rayberîya Îttîhat Terakî de ameyî qetilkerdiş. Ma veng danî ke ganî no qirkerdiş reyde rî bi rî bêrê.”
