Merdimê Vînîbîyayan û ÎHD’ê Amedî hewteyê 842. de aqûbetê vînîbîya Atîlla Osmanoglu persayê.
Merdimê Vînîbîyayan û Komeleya Heqê Merdiman (ÎHD) a Şaxê Amedî hewteyê 842. de çalakîya “Wa vînîbîya bêrê dîyayîş û kerdox bêrê dariznayîş” viraşt. Çalakî ra Rayberê ÎHD’î, Hemsereka DBP’î ya Amedî Sultan Yaray, Merdimê Vînîbîyayan û temsîlkarê rêxistinê sivîl û zaf hûmarî de kes beşdar bîyê. No hewte aqûbetê Atîlla Osmanoglu ame persayîş.
Metno ke behsa Atîlla Osmanoglu keno hetê endamê Komîsyonê Vînîbîyayan ê ÎHD’î Firat Akdenîz ra ame wendiş.
Aqûbetê vînîbîyayîşê Atîlla Osmanoglu wina yo:
“Atîlla Osmanoglu bi keyeyê xo Hezroyê Amedî de cuyaynî. Rîyê gefê lejkeran koçî merkezê Amedî keno. 25ê Adara 1996î de Atîlla Osmanoglu di polîs siwarî ‘toroso sipî’ kenê. Pîyê Muhyettîn Osmanoglu şono dadgeh vano; lajê mi polîsan girewtê û berdê. Polîsan aşkera kenê ke Atîlla nêameyo destbendkerdene û peynî zî qet agahî Atîlla Osmanoglu ra nîno girewtiş.
Endamê JÎTEM’î îtîraf kerd
Peynî Endamê JÎTEM’î Abdulkadîr Aygan vano ke Atîlla Osmanoglu hetê JÎTEM’î ra ameyo remnayîş û ameyo kiştiş. Keyeyê Osmanoglu serî Dadgeha Heqê Merdiman a Ewropa dano û Tirkîya mehkûmê tazmînatî beno.”
Peynîya beyanatî seba vîrardişê Osmanoglu û heme vînîbîyayan çalakîya roniştişî ame kerdene û çalakîya nê hewteyî bi peynî bî.
