Emserre rîyê wişkserrî genim wişk bîyê. Citkar Coşkun Onaç ke qezaya Silopî de cuyeno ard ziwan ke seba nêverayîşê varanî çandinîya înan wişk bîyê û zirar dîyî. Endazyarê Çandinîye Samet Ucaman zî dîyar kerd ke birnayîşê daristanan bandorê awhewayî û heme ganîyan keno.
Bedilyayîşê hewayî û krîzê awhewayî bandorê pêroyîya dinya keno. Krîzê awhewayî ke pê yeno, bandor cuyaya merdiman zî keno. Emserre Kurdistan de varan û vewr zaf bi kêm varayî. Goreyê daneyan serre bi serre varayîşê vewr û varanî kêm benê. Bi ameyîşê wisarî çimê citkaran varayîşê varanî de yo. Aşma adare bêvaran derbas bî, rîyê nêvarayîşê varanî ser o berê çandinîye wişk bîyê. Cotkar Coşkun Onaç ke 50 donum erdê ci est o, dewa Bedrû ya Silopî ya Şirnexî de çandinîye keno.
Babete ser o Cotkar Coşkun Onaç ard ziwan ke emserre wişkserrî ser o genimê ci wişk bî û wina va: “Ma zirarêko gird kerd. DEDAŞ zî nêveradeno ma sontajan ra hawil bigê û dest ser ronayî trafoyê ma yê awe. Karê citkarîye merdo.”
Birnayîşê daristanan bandor keno
Endezyarê Çandinîye Samet Ucaman zî aşkera kerd ke birnayîşê daran bandorêko nêyînî ser varanî keno û wina domna: “Seba bedilyayîşê demserrî krîzêko gird ser awhewayî est o. Aşm bedilyenê, citkar zî benda varanî yê û emserre zî wişkserrî zaf bî. Şirnex de birnayîşê daristanan zaf bi zêde yo. Birnayîşê daran bandorêko gird ser awhewa û varanî keno û bandorê ganîyan zî keno.”
Derheqê gerraya citkar Coşkun Onaç ser o ma Mudurîya Şirnexî ya DEDAŞ’î gêrayî la vatê ê nêeşkenî ser telefonî malûmatê hera bidê.
