Welatijê ke tewrê Newroza Amedî ya tarixî bîyê dÎyar kerd ke piştî danê vengdayîşê Rayberê Şarê Kurdî Abdullah Ocalanî û vat: “Seba ke Rayber nê prosesî rayîrî ra bero ganî îmkanê ey bêrê başkerdene û azad bibo.”
Bi pêşengîya Kongreya Komelo Demokratîk (KCD), Partîya Herêmanê Demokratîk (DBP), Partîya Têduştî û Demokrasîyî ya Şaran (DEM Partî) û Tevgerê Cinîyanê Azadan (TJA) bi sloganî “Raybero Azad Komelo Demokratîk” qada Newroze ya Amedî de bi beşdarîya se hezar kesan Newroze ameye pîrozkerdene. Se hezar kesî beşdarê Newroza ke seba vengdayîşê Aştî û Komelo Demokratîk ê Rayberê Şarê Kurdî Abdullah Ocalanî sey Newroza tarixî ameyêne pênasekerdene, bîyê. Welatijê ke teberî welat û şaristananê Kurdîstanî ra seba Newroze ameybê Amed, saetanê serê sibayî de vernîya qade de kom bîyê. Welatijê ke bi cil û belganê xo yê Kurdkîyan herikîyayê qada Newroze, bi coşêko pÎl Newroze pîroz kerd.
Qada Newroze de tewr zaf posterê Rayberê Şarê Kurdî Abdullah Ocalanî ameyê akerdene. Şar bi vatişê slogananê “Bijî Serok Apo”, “Bê Serok Jîyan Nabe” piştî daye vengdayîşê Abdullah Ocalanî. Ma zî sey Ajansê Welat (AW) qada Newroze de derheqê vengdayîşê Aştî û Komelo Demokratîk ê Abdullah Ocalanî mîkrofonê xo dergê welatijan kerd û derheqê prosesî de înan reyde qisey kerd.
‘Bi tecrîd no proses nêşono sere’
Welatij Mehmet Alî Aslan dîyar kerd ke vengdayîşê Rayberê Şarê Kurdî Abdullah Ocalanî ca de yo û wina vat: “Ma sey şarê Amedî û heme Kurdîstanî piştî danê vendayîşê Rayberî. Seba Wayîrvejîyayîşê vengdayîşî ganî şar çalakîyan bikero. Heta nika dewlete seba nê vendayîşî tu game nêeşta. Gnaî şarê kurdî wayîrê nê prosesî vejîyo. Vengdayîşê Rayberî hêvîyêka xurte daye şarî. Ganî dewlete zî estbîyayîş û heqanê şarê kurdî bigîra çiman ver û rojêk verê rojêk qerarê xo bida. Seba aştî û seyyewbînîye ganî qanûnê bingeyî de bedilîyayÎşan bikera. Ya tewr muhîme zî no yo ke seba ke Rayber bi xo nê prosesî aver bero, ganî îmkanê ey bêrê başkerdene. Bi tecrîd no proses aver nêşono.”
‘Ganê dewlete zî gaman bierza’
Welatija Gulsîme Poyraz zî ard ziwan ke ê aştî û seyyewbînî wazenê û nê çîyî vatî: “Ma heme wazenê êdî gonî vindera û aramîyêk biba. Ganî dewlete gaman bierza.”
‘Ganî dewlete gaman bierza ke ma ci ra bawer bikê’
Welatij Şîyar Kan ard ziwan ke ê seba vengdayîşê Aştî û Komelo DemokratÎk bi hêvî yê û wina vat: “Bawerîya ma bi Rayberê ma est a. La bawerîya ma bi dewlete çin a. Dewlete ganî gaman bierza ke ma ci ra bawer bikê. Ganî Rayber û girewteyê sîyasî veradîyê ke ma bivînê hela dewlet e zerrî ra nê karî kena. Vanê çekan ronê la hêriş kenê. Wa senî çekan ronê. Ganî ê zî tayê gaman bierzê ke çekî bêrê ronayene.”
‘Peynîya şerî nêyena, lazimtîya aştî est a’
Welatije Ayfer Çetîn zî derheqê vengdayîşê tarixî yê Rayberê Şarê Kurdî Abdullah Ocalanî de nê çîyê ardî ziwan. “Ma aştî wazenê. Ma wazenê Rayberê ma veradîyo. Eke şar zor bido û biwazo dewlete zî do neçar bimana ke gaman bierza.”
‘Ganî Rayber Abdullah Ocalan azad bibo’
Welatij Salîh Aksoy dîyar kerd ke dora dewlete ya ke gaman bierza û wina vat: “Ma wazenê proses aver şêro, azadîye bêra û Rayber Abdullah Ocalan azad bibo. Kurdan game eşte nika dora dewlete ya. Eke dewlete game nêerza proses zî aver nêşono. Amancê ma her tim aştî yo. Birêz Abdullah Ocalan Gamêka muhîme eşta, ma zî piştî danê nê vengdayîşî.”
