Aktîvîsta TJA’yî Hulya Alokmen Uyanik, bale ant serê Newroza ke do 89 merkezan de xususî do Amed bêro pîrozkerdiş û vat: “Na Newroze de ma venga pêro şarê xo, cinî û ciwanan kenê ke wayîrê perspektîf û deklerasyonê birêz Ocalanî vejîyê.”
Têgêrayîşê Cinîyanê Azadan (TJA), Kongereya Komelê Demokratîke (DTK), Partîya Herêmê Demokratîke (DBP) û Partîya Têduştî û Demokrasî (DEM Partî), deklarasyonê Newroza 2025ine eşkera kerd. Emser do Newroze 89 merkezî de bi sloganê “Raybero Azad Komelo Demokratîkî / Newroza, semedê azadîya komelêk demokratîkî” bêro pîrozkerdiş. Amed de 11ê adare de eşkerayîya startê pîrozkerdişê Newroze ame dayîş.
Derheqê pîrozbayîyan de aktîvîsta TJA’yî Hulya Alokmen Uyanik, ajansê Jinnewsî rê qisey kerd û bale ant amadekarîyanê Newroze ser o.
Hulya Alokmen Uyanık, destpêkê qiseykerdişê xo de bale ant taybetmendîyê aşma adare û vat: “Mîyanê na aşma de hem qirkerdişî pê ameyî û hem zî xoverdayîşê pîlî vejîyayî werte. Yew nînan ra Newroz a. Newroze hem semedê şarê kurdî û hem zî semedê şarê Rojhelatê Mîyanên rojêke muhîm a. Sey mewsim zî peynîbîyayîşê zimistanî û destpêkê wisarî ya. Sewbîna yê ke 8ê Adare awan kerdî û heta nê rojan bi xoverdayîş ardî. Emser ma 8ê Adare bi sloganê “Ma hemverê qirkerdişê cinîyan sere wedarnenê û ver bi azadîye rayîr ra şinê” pêşwazî kerd.”
Do verê xo bidê Newroze’
Hulya Alokmen Uyanik, qiseykerdişê xo de bale ant serê averşîyayîşê sîyasî û wina vat: “Cinîyî wayîrê perspektîfê Komelê Demokratîke û Aştîye yê Birêz Ocalanî vejîyayî. Xora Birêz Ocalan semedê cinîyanê kurdan, bi serran o xoverdayîşê cinîyan ser o, ewnîyayîşê cinîyan, fikrê cinîyan û çareserîya meseleya cinîyan de munaqeşeyê hîra dewam keno û felsefeya ‘Jin jiyan azadî ‘ awan kerd. Pêro cinîyê dinya nê ra îlham girewt. Sewbîna cinî nika wayîrê prosesê aştî, demokrasî û dîyalogî vejênê.”
‘Wayîrê vengdayîşê Ocalanî vejîyê’
Hulya Alokmen tewr peyîn wina vat: “Ma sey şarê kurdî reya ewil nîyo ke kewenê prosesêk winasî. Beno ke mîyanê merdiman de têmîyanî virazîyo. Ma nê çî baş zanê, bi rastî komelo tewr sîyasî yê Rojhelatê Mîyanênî şarê kurdî yo. Nê semedî ra ma do rêxistinbîyayîşî tewr zêde bikerê û rayîr nêdê ke proses bi polîtîkayê şerê taybetî xira bibo. Nê semedî ra, Çapemenîya Azade taqîb bikerê û şima eşkenê vejê ka kam çi vano. Çîyo tewr muhîm zî ganî bêro zanayîş ke yewin rayîrê cewabdayîşê nê prosesî bi rêxistinbîyayîş o. Ma nê vanê û ma zanê ke şarê ma demê tewr xidar de zî senî ware pirr kerdo û heskerdişê xo semedê azadîye ardo ziwan. Na Newroze de ma venga pêro şarê xo kenê, cinî û ciwanan kenê ke zêdeyêr wayîrê perspektîf û vengdayîşê birêz Ocalanî vejîyê.”
