Serekê Şaredarîya Şaristanê Girdî yê Stenbolî Ekrem Îmamogluyî derheqê vengdayîşê Rayberê PKK’yî Abdullah Ocalanî de va: “Ma vengdayîşî erjaye vînenê. La berpirsîyarî tena yew hetî de nîya, ê kesî ke nê welatî îdare kenê înan ser o zî ya.”
Heyetê Îmrali yê Partîya Têduştî û Demokrasîyî ya Şaran (DEM Partî) vizêrî badê pêvînayîşê bi Rayberê PKK’yî Abdullah Ocalanî vengdayîşê Abdullah Ocalanî îlan kerd. Serekê Şaredarîya Şaristanê Girdî yê Stanbolî Ekrem Îmamogluyî hesabê xo yê medya sanale ra derheqê vengdayîşî de ke bi sernameyê “Aşitî û Komelê Demokratîkî” ameyo îlankerdene, nuşteyêk pare kerd.
‘Berpirsîyarî îdarekaranê ke welatî îdare kenê înan ser o ya zî’
Îmamogluyî dîyar kerd ke her xebat û cehdê ke seba aşitî bo, muhîm ê û va: “Ma na wesîle ra vengdayîşî erjaye vînenê. La berpirsîyarî tena yew hetî de nîya, ê kesî ke nê welatî îdare kenê, înan ser o zî ya. Meseleyê muhîm o yo ke Tirkîya bi rastî goreyê ûsulanê demokratîkî, huqûqî û goreyê heqanê însanan bêro îdarekerdene.”
Îmamogluyî parekerdişê xo de wina dewam kerd: “Fikrê Komare tam nêyî îzeh keno; bêşert heme şarê xo gêno zere û quç keno. Ma ganî pîya dejanê verênan ra ders bigîrê û ameyoxê xo yê muşterekî bi aşitî awan bikê. Ma do seba Tirkîyaya azade û demokratîke xoverdayîşê xo bi qerardarî bidomnê.”
