• Kurmancî
  • Kirmanckî
  • |
  • Derheqê Ma De
  • |
[email protected]
Ajansa Welat
21 MIJDAR 2026
No Result
View All Result
  • ROJANE
  • CINÎ
  • EKONOMÎ
  • POLÎTÎKA
  • EKOLOJÎ
  • KOMEL
  • WEŞÎYE
  • DINYA
  • FORUM
  • HUQÛQ
  • KULTUR
  • SPOR
  • Heme Xeberî
  • ROJANE
  • CINÎ
  • EKONOMÎ
  • POLÎTÎKA
  • EKOLOJÎ
  • KOMEL
  • WEŞÎYE
  • DINYA
  • FORUM
  • HUQÛQ
  • KULTUR
  • SPOR
  • Heme Xeberî
No Result
View All Result
Ajansa Welat
No Result
View All Result

Aqûbeta cinîyanê ke ameyê kiştiş û vîndîkerdiş ame persayîş

Merkezê Xeberan / AW

21 MIJDAR 2026 - 16:29
Kategorî: KIRMANCKÎ - MANŞET, KIRMANCKÎ - ROJANE
A A
Çalakîya Merdimanê Vîndîbîyayan û ÎHD’yî ya ke her hewte bena, Amed, Êlih, Gever û Îzmîr de ame kerdiş. Çalakîya nê hewteyî ya Amed û Îzmîrî de, bi munasebetê nêzdîbîyayîşê 25ê teşrîna peyêne, aqûbeta 20 cinîyan ame persayîş. Nê cinî serranê 90’an de destbend bîbî û dima înan ra tu xeber nêame girewtiş.

AMED

Merdimanê Vîndîbîyayan û îdarekaranê Şûbeya ÎHD’yî ya Amedî çalakîya xo ya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 928. de verê Abîdeya Heqê Cuyayîşî ya Parka Koşûyolûyî ya qezaya Rezanî ya Amedî de dewam kerde. Pawitoxê heqanê merdiman, endam û îdarekarê sazgehanê sîvîlan ê komelkî û merdimê vîndîbîyayan tewrê çalakîye bîyî. Çalakîye de fotografê cinîyanê ke ameyê vîndîkerdiş û qetilkerdiş ameyê girewtiş.

Çalakîya nê hewteyî de bi munasebetê 25ê Teşrîna Peyêne, Roja Têkoşînê Vera Şîdetê Ser Cinîyan a Dinya, cinîyê ke ameyê qetilkerdiş ameyî vîrardiş. Îdarekara Şûbeya ÎHD’yî ya Amedî Eylem Kaya hîkayeya vîndîkerdiş û qetilkerdişê cinîyan wende û wina va: “Ma heme cinîyanê ke bi zor ameyê vîndîkerdiş û bîyê qurbanê kiştişanê sîyasîyan ê ke faîlê înan eşkera nîyê, bi hurmet vîr ra anê. Çiqas serrî bivîyarê wa bivîyarê, ma tekrar kenê ke ma waştişê edaletî ra dest nêverdanê. Ma dewlete rê veng danê ke mesulîyetanê xo yê ke huquqê mîyanneteweyî ra yenê, bica bîyaro.”

Dima Hemverfeka Platforma Cinîyan a Amedî Esra Çîçeke va ke ê vîndîbîyayanê xo bi hurmet vîr ra anê û wina qisey kerd: “Wa no şîdetê ke Dayîkanê Şemeyî ser o yo, wedarîyo. Verê ma de 25ê teşrîna peyêne est a; cinî hetê dewleta camêrdî ra raştê şîdetî yenê, ma nê şîdetî şermezar kenê. 25ê teşrîna peyêne de ma do Çarrayîra Dinya ra heta Parka Rojawa rayra şêrê û nê şîdetî şermezar bikerê.”

Eşkerayîye bi deqîqeyêk çalakîya roniştişî qedîya.

ÎZMÎR

Şûbeya Îzmîrî ya Komela Heqê Merdiman (ÎHD) bi munasebetê 25ê Teşrîna Peyêne, Roja Mîyanneteweyîye ya Têkoşînê Vera Şîdetê Ser Cinîyan, hîkayeyê remnayîş û vîndîkerdişê 20 cinîyan ê ke komele eşkayêne tesbît bikera, raya pêroyîye reyde pare kerdî û aqûbeta înan perse. Eşkerayîya çapemenîye verê Sumer Bankê kehenî yê Konakî de ame dayîş.

Eşkerayîye de pankartê “Vîndîbîyayî eşkera yê, kiştoxî kotî de yê?” û “Vîndîbîyayîş wijdanê to yo, wayîrê wijdanê xo vejîye” ameyî akerdiş. Endama Heyetê Îdareyê Merkezî (MYK) ya ÎHD’yî Eren Keskîne û zaf kesî tewrê eşkerayîye bîyî. Eşkerayîye hetê Endama Heyetê Îdareyî ya ÎHD’yî Evrîm Kubîlaye ra ame wendiş.

‘Cografyaya ma cografyaya mezelanê vîndîbîyayan a’

Endama Heyetê Îdareyê Merkezî ya ÎHD’yî Eren Keskîne verê eşkerayîye qisey kerd. Aye dîyar kerd ke na cografya de vîndîkerdişo bi zor polîtîkaya dewlete ya û wina va: “Na polîtîkaya ke xo dana verê komarî. Mabênê serranê 1915-1938 de Kurdîstan de zaf qirkerdişî bîyî û zaf vîndîbîyayî est ê. Heta cografyaya ma cografyaya mezelanê vîndîbîyayan a. Mîyanê înan de cinî cayêkê muhîm gênê. Na polîtîkaya Dewleta Komarê Tirkîya hebûnîya xo bi bêcezayîye dewam kena. Tena kesê ke faîlê vîndîkerdişê cinîyan ê mesul nîyê; makamê hukmî yê ke înan ser o tehqîqat nêkenê zî şirîkê na mesulîyete yê. Eynî wext de seba ke Dewleta Komarê Tirkîya îmzekerdişê Peymaneya Neteweyanê Yewbîyayeyan a derheqê vîndîkerdişê bi zor de qebul nêkena, demvîyartişî sey perdeyêk seba nimitişê nê sucî dewam kena. Ma do dima cinîyanê ke ameyê vîndîkerdiş de bê. Ma sey Pawitoxanê Heqanê Merdiman seba qedênayîşê polîtîkaya bêcezayîye ya derheqê înan de, ma do têkoşînê xo heta peynî dewam bikerê.”

Evrîm Kubîlaye zî bale ante ser ke 25ê teşrîna peyêne roja mojnayîş û teşhîrkerdişê her tewir şîdetê ser cinîyan, vîrardişê mesulîyetanê dewletan û pîlkerdişê waştişê cuyêka ke binge de wekhevîye bo, a. Aye dîyar kerd ke pawitişê heqê cuyayîşî yê cinîyan wezîfeya dewlete ya ke nêeşkîyena bêro devirkerdiş, a.

Evrîm Kubîlaye dîyar kerd ke çiqas serrî bivîyarê wa bivîyarê, ê do waştişê edaletî yê seba heme vîndîbîyayan ra dest nêverdê û va: “Ma do vîrardişê nê çîyî ke ganî dewlete mîyanê normanê huquqê unîversalî de hereket bikero ra dest nêverdê.”

Eşkerayîye badê çalakîya roniştişî ya panc deqîqeyan qedîya.

Hîkayeyê 20 cinîyan

Çalakîya Amed û Îzmîrî de hîkayeyê remnayîş û vîndîkerdişê 20 cinîyan wina ameyî wendiş:

  • Seba Makbule Okdene ya ke serra 1991î de Cizîr de destbend bîbî û badê 18 serran, wexto ke xebatê viraştişê rayîrî bîyêne, estiyê aye ameyî dîyayîş, ma edalet wazenê!
  • Seba Bedriye Gumuşe ya ke 17ê sibate ya 1992î de Nisêbîn de, wexto ke leşkeran şarê ke waştêne zextanê cerdewamîye protesto bikero ser o ber teqna, merde, ma edalet wazenê!
  • Seba Ayten Ozturke ya ke 27ê temmuze ya 1992î de Dêrsim de destbend bîbî û badê 8 rojan, 14ê tebaxe ya 1992î de cenazeya aye ya ke sebebê îşkenceyî ra nêameyêne naskerdiş, Kartepeya Karşiyaka ya Xarpêtî de binê erdî de ame dîyayîş, ma edalet wazenê!
  • Seba Ridda Yavuze ya ke Dêrik ya Mardînî de 2 kesan reyde destbend bîbî û dima aye ra tu xeber nêame girewtiş, ma edalet wazenê!
  • Seba Sedika Dale ya ke êlula 1993î de Mehleya Selahaddîn Eyyubî ya qezaya Nisêbînî de hetê Hîzbullahî ra çewal kerd sereyê aye û remnaye û dima aye ra tu xeber nêame girewtiş, ma edalet wazenê!
  • Seba Hamîde Şarli ya ke 24ê kanûne ya 1993î de keyeyê xo yê dewa Wanikê ya Tetwanê Bedlîsî ra birayê xo Ramazanî reyde hetê leşkeran ra destbend bîbî û dima aye ra tu xeber nêame girewtiş, ma edalet wazenê!
  • Seba Hatun Işike, Yeter Işike, Elîf Işike, Gulîzar Serîne û kêna aye ya 3 serre Dîlek Serîne ke 24ê êlula 1994î de badê operasyonê leşkerî yê dewa Mîrikê ya Dêrsimî înan ra tu xeber nêame girewtiş, ma edalet wazenê!
  • Seba Lutfiye Kaçare ya ke 5ê teşrîna verêna 1994î de Îstanbul de destbend bîbî û dima aye ra tu xeber nêame girewtiş, ma edalet wazenê!
  • Seba Gulnaz Tatu û Kadriye Tatu ke 17ê teşrîna verêna 1994î de zozanê dewa Ortaçê ya qezaya Dêrxasî ya Mûşî de, wexto ke seba dotişê heywanan şîbî, mîyanê operasyonêkê leşkerî de mendî û dima înan ra tu xeber nêame girewtiş, ma edalet wazenê!
  • Seba Ayşenur Şîmşeke ya ke 24ê çele ya 1995î de Ankara de destbend bîbî û cenazeya aye ya îşkencekerdîye badê 76 rojan Mezelê Bêkesan ê Kirikkaleyî de sey “kesê ke nasnameyê ey eşkera nîyo” binê erdî de ame dîyayîş, ma edalet wazenê!
  • Seba Hatîce Şîmşeke ya ke gulana 1995î de Bismilê Amedî de destbend bîbî û dima aye ra tu xeber nêame girewtiş, ma edalet wazenê!
  • Seba Şukran Daşe ya ke 7ê êlula 1996î de baskunê polîsanê sîvîlan ê Mudurîya Emnîyetî ya Amedî yê keyeyêkê Rezanê Amedî de destbend bîbî û dima aye ra tu xeber nêame girewtiş, ma edalet wazenê!
  • Seba Hatîce Atalaye ya ke 10ê êlula 1996î de wexto ke zemînê xo yo ke yew kîlometre keyeyê aye ra dûrî bî awe dayêne, bi berteqnayîşê mudurîya emnîyetî merde, ma edalet wazenê!
  • Seba Fahriye Mordenîze ya ke 28ê teşrîna peyêne ya 1996î de Amed de mêrdê xo Mahmutî reyde destbend bîbî û badê 2 serran ame famkerdiş ke Mezelê Asrî yê Cizîrî de sey “kesê ke nasnameyê ey eşkera nîyo” ameya binerdkerdiş la hema zî mezela aye nêameya dîyayîş, ma edalet wazenê!
  • Seba Zozan Erene ya ke 26ê êlula 1997î de rayîrê Pasûr-Amedî ser o otomobîlê înan ame vindarnayîş, mêrdê xo Orhanî reyde bi Torosêkê sipî ame remnayîş û dima aye ra tu xeber nêame girewtiş, ma edalet wazenê!
  • Seba Neslihan Uslu ya ke 31ê adare ya 1998î de Alaçatî ya Çeşmeyê Îzmîrî de 3 embazanê xo reyde destbend bîbî û dima aye ra tu xeber nêame girewtiş, ma edalet wazenê!
  • Seba Konca Kurişe ya ke şewa 16ê temmuze ya 1998î de Mersîn de hetê Hîzbullaha ke dewleta kûre ra girêdaye ya ra ame remnayîş û 21ê çele ya 2000î de badê îşkenceyî bodrumê vîlayêkê Meramê Konya de cenazeya aye ame dîyayîş, ma edalet wazenê!
  • Seba Dayîka Taybete, Taybet Înane ya ke 14ê kanûne ya 2015î de Silopî de wextê qedexeya kuçeyan de ame qetilkerdiş û cenazeya aye hewt rojî mîyanê kuçe de mende, ma edalet wazenê!
  • Seba Gulîstan Doku ya ke 5ê çele ya 2020î de Dêrsim de vîndî bîye û no tarîx ra nat aye ra tu xeber nêame girewtiş, ma edalet wazenê!
  • Seba Nagihan Akarsele ya ke 4ê teşrîna verêna 2022î de verê keyeyê xo yê Silêmanî de raştê hêrişêko çekdar ameye, ma edalet wazenê!
  • Seba Gulîstan Tara ya ke 23ê tebaxe ya 2024î de Silêmanî de bi hêrişê SÎHA’yî merde, ma edalet wazenê!
  • Seba rojnamegere Cîhan Bîlgîne ya ke 19ê kanûne ya 2024î de embazê xo Nazim Daştanî reyde, wexto ke averşîyayîşê Rojawayî cayê hedîseyî de taqîb kerdêne, bi hêrişêkê hewayî ameya qetilkerdiş, ma edalet wazenê!

ÊLIH

Merdimanê Vîndîbîyayan û îdarekaranê Şûbeya ÎHD’yî ya Êlihî zî hewteyo 764. de çalakîya “Wa Vîndîkerdeyî Bêrê Vînayîş, Faîlî Bêrê Muhakemekerdiş” verê Abîdeya Heqanê Merdiman a Cadeya Gulistanî de kerde. Çalakîya nê hewteyî de Merdimê Vîndîbîyayan aqûbeta Siddik Kayayî persayî. Siddik Kaya 20ê teşrîna peyêne ya 2002î de dewa Qerepûngalê ya qezaya Vartoyî ya Mûşî de hetê hêzanê dewlete ra ameybî remnayîş û vîndîkerdiş. Îdarekar û endamê ÎHD’yî, Merdimê Vîndîbîyayan, endamê sazgehanê komelkî û zaf kesî tewrê çalakîye bîyî. Çalakîye de fotografê kesanê ke destbend de ameyê vîndîkerdiş û qetilkerdiş ameyê girewtiş. Hîkayeya Siddik Kayayî hetê Hemserekeya ÎHD’yî ya Êlihî Melek Atalaye ra ame wendiş.

Eşkerayîye bi deqîqeyêk çalakîya roniştişî qedîya.

COLEMÊRG

Şûbeya ÎHD’yî ya Colemêrgî û Merdimanê Vîndîbîyayan çalakîya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 254. de Kuçeya Hunerî ya Geverî de dewam kerde. Çalakîya nê hewteyî de ÎHD û Merdimê Vîndîbîyayan aqûbeta Îslam Terkogluyî persayî. Îslam Terkoglu 23ê teşrîna peyêne ya 2006î de merkezê Geverî de hetê leşkeran ra ameybî qetilkerdiş.

Eşkerayîye hetê Hemverfekê Komîsyonê Vîndîbîyayan ê ÎHD’yî Eren Baskinî ra ame wendiş. Eşkerayîye de ame dîyarkerdiş ke herçiqas 20 serrî vîyarte zî dawaya Îslam Terkogluyî de tu çî nêameyo kerdiş.

Eşkerayîye bi çalakîya roniştişî qedîya.

Tags: 25ê Teşrîna PeyêneAmedDayîkê ŞemeyîÊlihGeverÎHDİzmirKiştişê cinîyanMerdimê Vîndîbîyayanvîndîkerdiş
ShareTweetSendShareShare

Nûçeyên Din

Hesekê de ciwanêk bi gulleyanê eskeranê Tirkan ame kiştiş

Çalakîya KHK’yî: ‘Polîtîkaya îxracî hêrişêko vera keda cinîyan a’

21 MIJDAR 2026
Welatijê Amedî: ‘Wextê gamanê şênberan o, ganî hepsîyê nêweşî texlîye bibê’

Welatijê Amedî: ‘Wextê gamanê şênberan o, ganî hepsîyê nêweşî texlîye bibê’

21 MIJDAR 2026
Şarê Amedî: Gamê şênberî hewceyê û gerekê girewtîyê nêweşî bêrê veradayene

Şarê Amedî: Gamê şênberî hewceyê û gerekê girewtîyê nêweşî bêrê veradayene

21 MIJDAR 2026
Lajê apê Tuncer Saglamî: ‘Ma no derd ante, ma nêwazenê ke tu keye no derd bianco’

Lajê apê Tuncer Saglamî: ‘Ma no derd ante, ma nêwazenê ke tu keye no derd bianco’

21 MIJDAR 2026
‘Armancê ma cinîya azade û komelo azad o’

‘Armancê ma cinîya azade û komelo azad o’

21 MIJDAR 2026
Dayîka Newroz Bozkurte: Rewşa Newroze giran a, bila bêro raverdayene

Dayîka Newroz Bozkurte: Rewşa Newroze giran a, bila bêro raverdayene

20 MIJDAR 2026

↗️ XEBERÊ KE ZAF AMEYÊ WENDIŞ

TOHAV’î avûkatê Kurdî yê ke ameyê qetilkerdiş vîr ardî

TOHAV’î avûkatê Kurdî yê ke ameyê qetilkerdiş vîr ardî

21 MIJDAR 2026
Aqûbeta cinîyanê ke ameyê kiştiş û vîndîkerdiş ame persayîş

Aqûbeta cinîyanê ke ameyê kiştiş û vîndîkerdiş ame persayîş

21 MIJDAR 2026
‘Ma do bi awankerdişê komîneyan nê prosesî de biresê serkewtiş’

‘Ma do bi awankerdişê komîneyan nê prosesî de biresê serkewtiş’

21 MIJDAR 2026
Hesekê de ciwanêk bi gulleyanê eskeranê Tirkan ame kiştiş

Çalakîya KHK’yî: ‘Polîtîkaya îxracî hêrişêko vera keda cinîyan a’

21 MIJDAR 2026
Girewteya neweşe Newroz Bozkurte vaznaya ra neweşxane!

Muracatê peydeştişê înfazî yê seba Newroz Bozkurte bê cewab mend

21 MIJDAR 2026

ARŞÎV

  • MIJDAR 2026 (294)
  • COTMEH 2026 (357)
  • ÎLON 2026 (274)
  • TEBAX 2026 (308)
  • TÎRMEH 2026 (406)
  • HEZÎRAN 2026 (336)
  • GULAN 2026 (327)
  • NÎSAN 2026 (349)
  • ADAR 2026 (422)
  • SIBAT 2026 (387)
  • ÇILE 2026 (540)
  • KANÛN 2025 (254)
  • MIJDAR 2025 (226)
  • COTMEH 2025 (209)
  • ÎLON 2025 (232)
  • TEBAX 2025 (210)
  • TÎRMEH 2025 (299)
  • HEZÎRAN 2025 (257)
  • GULAN 2025 (334)
  • NÎSAN 2025 (265)
  • ADAR 2025 (317)
  • SIBAT 2025 (317)
  • ÇILE 2025 (298)
  • KANÛN 2024 (293)

Ajansa Welat, bi xeberanê xusûsîyan, dosya, cigêrayîş, dîmen û vengan komelî agahdar û roşnî kena.

Bi şîarê agahîyanê raşt û objektîfan weşanî esas gêna, serê şopa heqîqetî de agahîyan vila kena.

Ajansa Welat bi xeber û tedeyanê xo bena veng û rengê welatî.

Xwediyê Îmtîyazê: Fahrettin Kılıç

Berpirsiyarê Karên Nivîsan: Mahmut Altıntaş

Navnîşan: Fırat Mahallesi, 553. Sokak, Tanlar Şehri Teras Evleri, B Blok,
Kat: 5 - No: 40, Kayapınar, Diyarbakır

Telefon: +90 (532) 519 37 73

E-mail: [email protected]
Malper: www.ajansawelat1.com
Twitter Youtube Instagram Whatsapp
  • Serrûpel
  • Têkilî
  • Derbarê Me De

© 2024 Ajansa Welat ● Yekemîn Ajansa xwerû Kurdî ● Hemû maf parastî ne

No Result
View All Result
  • HEME XEBERÎ
  • ROJANE
  • CINÎ
  • EKONOMÎ
  • POLÎTÎKA
  • EKOLOJÎ
  • KOMEL
  • WEŞÎYE
  • DINYA
  • FORUM
  • HUQÛQ
  • KULTUR
  • SPOR
  • KURMANCÎ

© 2024 Ajansa Welat ● Yekemîn Ajansa xwerû Kurdî ● Hemû maf parastî ne