Sekretera Pêroyî ya Partîya Basels starke Alternative (BastA!) Franziska Stiere dîyar kerd ke Rayberê Şarê Kurdan Abdullah Ocalan şert û mercanê zehmetan de azadîya xo ney, perspektîfê çareserîye aver beno û wina vat: “Çîyo ke bi taybetî mi ser o tesîr kerd, beyanatê Abdullah Ocalanî yê derheqê dîyalog, rayîrê sîyasetî û cigêrayîşanê ey ê çareserîye de yê.”
Ankara – Vengdayîşê tarîxî yê Aştîye û Komelê Demokratîkî yê Rayberê Şarê Kurdan Abdullah Ocalanî pêroyê dinya de veng da. Vengdayîşî ra pey warê mîyanneteweyî de zaf sosyalîst, akademîsyen û sîyasetmedaran seba ke şêrê Girawa Îmrali, Wezareta Edaletî rê muracat kerd. Sewbîna seba azadîya fîzîkî ya Abdullah Ocalanî kampanyaya “Freedom For Abdullah Ocalan” dest pêkerd û dewam kena. Franziska Stiere zî 9ê hezîrana 2025î de seba pêdîyayîşê Abdullah Ocalanî Wezareta Edaletî ya Tirkîya rê muracat kerd û xebatanê kampanya de ca gêna. Franziska Stiere persanê Ajansa Welat (AW) rê cewab da.

Şima seba pêdîyayîşê Abdullah Ocalanî muracat kerd. Şima cewabêk girewt?
Ney, hema mi tu cewab nêgirewto. Çîyo ke o dem cîya kerdêne no bî ke seba aştîye vengdayîşêk ame kerdene. Ocalanî tekîd kerd ke ganî nê ra pey têkoşînê azadîye bi metodanê demokratîkan bêro ramitene. Taqîbkerdişê prosesî nêzdî ra zaf muhîm o. Eke rêxistinê mîyanneteweyî nê warî de berpirsîyarîye nêgêrê xo ser, ganî ma sey komelê sîvîlî însîyatîfe bigîrê.
Eke şima bişêrê Abdullah Ocalanî reyde pêdîyayîş bikerê, şima wazenê ey ra çi vajê?
Lêgerîna ey seba rayîrêkê vejîyayîşê şerî bî, ne heyfgirewtiş. Amancê ey çareserî ya. Têgêrayîşê azadîye zaf rey kewnê dafêk ke tede têkoşîn bi xo beno amanc. Seba naye mi rê zaf balkêş o ke Abdullah Ocalan nê şert û mercanê zehmetan de azadîya xo ya şexsî ney, perspektîfê çareserîye aver beno. Eke firsendê mi bibo ez wazena ey ra biperse ke fikrê ey ê derheqê azadîya cinîyan de senî aver şîyê û ma senî eşkenê vernîya şîdetî bigîrê.
Fikr û paradîgmaya Abdullah Ocalanî warê mîyanneteweyî de senî tesîr kena?
Konfederalîzmo Demokratîk mi ser o zaf tesîr kerd. Konfederalîzmo demokratîk de bedilîyayîşê komelî cor ra ferz nêbeno; merdimî tena eşkenê no bedilîyayîş pîya biceribnê û bîyarê ca. No nêzdîbîyayîş tradîsyonanê sosyalîstan ê sey Rosa Luxemburgî reyde têkildar o. Seba mi hîrê mewzûyî muhîm ê: rêxistinbîyayîşo herêmkî, pawitiş û temsîlê sîyasî yê kêmneteweyanê etnîkî û dînî û vîzyonê bedilîyayîşê komelkî-ekolojîkî.
Şima Prosesê Aştîye û Komelê Demokratîkî senî erjnenê?
Ez prosesî nêzdî ra taqîb kena. Ereynayîşê tayê çîyan ke ganî bi lez bêrê kerdene merdimî dejnenê. Bêşik gamê muhîmî ameyî eştene; PKK’yî xo fesx kerd û prosesê bêçekbîyayîşî da destpêkerdene. Qanûnêkê çarçewayî Parlamento de ame qebulkerdene. La qanûn tena bêçekbîyayîşê PKK’yî rast keno; heqanê demokratîkan ê şarê kurdan garantî nêkeno. Naskerdişê nasnameyê sîyasî û kulturî yê kurdan û demokratîkkerdişê sazgehanê dewlete seba aştîye muhîm ê. Nê problemanê ra hema yew zî çareser nêbîyo.
Têkoşînêko sosyalîst o mîyanneteweyî senî eşkeno aver şêro?
Çepgirê sîyasî zaf rey seba hemkarîyêka dergmudete û stratejîyêka hempare teng benê. La hewcedarîyêka girde esta. Ganî enternasyonalîzm tena bi mesajanê piştîdayîşî aver nêşêro; bi têkoşînêko hempar û awankerdişê waranê demokratîkan aver şêro. Seba naye ganî çar hetanê dinya de merdimî hîna zaf bibê parçeyê nê têkoşînî.











