Qers – Mûzaffer Gurcey ke 35 serrî yo qezaya Bazarcixî de asinkarîye keno, no kar pîyê xo het de musayo. Mûzaffer Gurcey heme hewcedarîyanê tamîr û viraştişê haletan ê qeza û dewanê nêzdîyan tena bi xo bica ano.
Mûzaffer Gurcey ke 35 serrî yo qezaya Bazarcixî ya Qersî de karê asinkarîye keno, no kar destê pîyê xo de musayo; pîyê ey zî mektebê hunerî yê merkezê Qersî de musayo. Bazarcix û dewanê dorûverê aye de şarî rê çi hewcedarîyê tamîrî bibê, yenê Mûzaffer Gurceyî het. Bi pêroyî wexto ke haletê ramitişî şikîyenê yan zî nêxebitîyenê, anê ey het û danê tamîrkerdiş. Sewbîna seba dewijan ber û pencereyan virazeno û bi nê karî debara keyeyê xo keno.
Mûzaffer Gurceyî seba ajansê ma behsê karê xo kerd.
Makîneyê neweyî karê înan şenik kerdo
Mûzaffer Gurceyî behsê zehmetîya karê xo kerd û dîyar kerd ke verê cû karê ey zehmetêr bî la badê vejîyayîşê haletanê neweyan ê tamîrî û averşîyayîşê teknolojî karê ey asanêr bîyo. Mûzaffer Gurceyî da zanayîş ke ey no kar pîyê xo ra girewto û wina vat: “35 serrî yo ez tîya no kar kena. Cuya mi bi no hawa vîyarte. Ez tamîrê haletanê ramitişî kena, hacetanê motoran, meqes û beran virazena. Hetanî aşma teşrîna peyêne karê ma wina dewam keno. Tîya taybetîya her haletî est o. Ma goreyê hewcedarîye makîneyanê cîya-cîyayan xebitnenê. Verê cû nê makîneyî çin bîyî, karê ma zehmetêr bî. Verê cû asinkarî zor bî, ma bi çakûçan kuyêne ke asinî rê şekil bidê. Nika bîyo qumçe; ti nê qumçeyan ro danê û her çî kenê.”
Welatijê qeza û dewanê dorûverî pêro yenê ey het
Mûzaffer Gurceyî ard ziwan ke dorûverê Bazarcixî ra zî şarî rê çi hewcedarîyê tamîrî bibê, yenê ey het û wina vat: “Cuya mi ya pêroyine tîya vîyarte, ez tu cayêk nêşîya. Bi nê karî mi domanê xo weyî kerdî û debara keyeyê xo kerde. Domanê mi pêro pîl bîyî. Ez nê karî ra hes kena; wexto ke ez nêşêra dikanê xo, ez rehet nêbena. Mi sîgortaya xo (Bag-Kur) bi xo kerde û ez teqawît zî bîya. Dorûver ra yenê û çi hewcedarîya înan bibo, ma hetkarîye kenê. Pîyê mi no kar mektebê hunerî de musabi, ez zî ey het de musaya. Nika zî zaf keyeyî domananê xo şawenê ke perwerdeyê karanê winayênan bivînê.














